రాజమండ్రి జైలులో ఖైదీకి కరోనా పాజిటివ్

ఆంధ్రప్రదేశ్‌లో కొత్త కరోనా కేసుల పెరుగుదల తీవ్ర ఆందోళన కలిగిస్తోంది. ఇటీవలె కరోనా బారిన పడి ఓ వృద్ధుడు చనిపోవడం కలకలం రేపింది. తాజాగా తూర్పు గోదావరి జిల్లాలోని రాజమండ్రి సెంట్రల్‌ జైలులో ఓ కరోనా కేసు నమోదు కావడం తీవ్ర సంచలనంగా మారింది.  జైలులోని ఓ ఖైదీకి కరోనా పాజిటివ్‌గా నిర్ధారణ కావడంతో జైలులో ఉన్న మిగితా నిందితులు, ఖైదీలు తీవ్ర ఆందోళన చెందుతున్నారు.

అయితే అతడిని ఆస్పత్రికి తరలించి జైలు అధికారులు చికిత్స అందిస్తున్నారు. కాకినాడకు చెందిన 67 ఓ వృద్ధుడికి తాజాగా జైలులో కరోనా సోకింది. ఈ ఏడాది మే నెలలో ఓ కేసులో దోషిగా తేలడంతో ఆ వృద్ధుడికి శిక్ష పడడంతో రాజమండ్రి సెంట్రల్ జైలుకు తరలించారు. ఈ నెల 17 నుంచి దగ్గు, జలుబు, జ్వరం ఉండడంతో జైలు ఆస్పత్రికి తరలించి జైలు అధికారులు చికిత్స అందించారు. అయితే ఈనెల 19 వ తేదీన జ్వరం ఎక్కువ కావడంతో జీజీహెచ్‌కు తరలించారు. 

కరోనా లక్షణాలు ఉండటంతో కరోనా టెస్టులు చేయగా శనివారం టెస్ట్ ఫలితం రావడంతో కరోనా పాజిటివ్ వచ్చినట్లు వైద్యులు నిర్ధారించారు. ఆ వృద్ధుడికి ఆర్టీపీసీఆర్‌ టెస్ట్ చేసిన డాక్టర్లు వాటి ఫలితాలను ల్యాబ్‌కు పంపించారు. దీంతో అప్రమత్తమైన జైలు సిబ్బంది ఆ వృద్ధుడు ఉన్న బ్యారక్‌ పరిసర ప్రాంతాల్లో శానిటైజేషన్ చేయించారు. 

ఇతర ఖైదీలకు కరోనా సోకకుండా చర్యలు తీసుకున్నారు. మరోవైపు ఇతర ఖైదీలు, జైలు సిబ్బందికి కూడా కరోనా టెస్టులు చేయిస్తున్నట్లు జైలు సూపరింటెండెంట్ తెలిపారు. ప్రస్తుతం ఆ వృద్ధుడిని ఆస్పత్రి ఐసోలేషన్‌ వార్డులో ఉంచి చికిత్స అందిస్తున్నారు. అయితే ఆ వృద్ధుడు ప్రస్తుతం కోలుకుంటున్నాడని డాక్టర్లు తెలిపారు.