పర్చూరు ఓట్ల తొలగింపులో నలుగురు పోలీసులపై వేటు!

బాపట్ల జిల్లా పర్చూరు నియోజకవర్గంలో ఓట్ల తొలగింపుపై రాష్ట్ర ఎన్నికల సంఘం కొరడా ఝుళిపించింది. అధికార పక్షం నాయకులు చెప్పినట్లు రాజకీయ ప్రత్యర్థుల  ఓట్ల తొలగింపులో జోక్యం చేసుకున్న నలుగురు పోలీసులపై చర్యలు తీసుకుంది.  టీడీపీ ఎమ్మెల్యే ఏలూరి సాంబశివరావు ఫిర్యాదుతో విచారణ చేపట్టిన ఎన్నికల సంఘం, బాపట్ల ఎస్పీని నివేదిక కోరింది.

ఎస్పీ నివేదికతో ఓట్ల తొలగింపులో జోక్యం చేసుకున్న మార్టూరు సీఐ, ఎస్సై, పర్చూరు, యద్దనపూడి ఎస్సైలను సస్పెండ్ చేస్తూ సీఈవో ముకేశ్ కుమార్ మీనా నిర్ణయం తీసుకున్నారు.  అంతే కాకుండా ఓట్ల తొలగింపుతో సంబంధం ఉన్న బీఎల్వోలు, మహిళా పోలీసులపైనా చర్యలు తీసుకోవాలని ఉన్నతాధికారులను ఆదేశించారు.

ఎన్నికల విధుల్లో పాల్గొన్న మహిళా పోలీసులపై నిబంధనలకు విరుద్ధంగా ఒత్తిడి తీసుకొచ్చి ఓట్ల తొలగింపు కోరుతూ వచ్చిన దరఖాస్తుల సమాచారాన్ని అధికార పార్టీకి చెందిన నేతలకు అందించారని ఎమ్మెల్యే ఈసీకి ఫిర్యాదు చేశారు. దీనిపై సీఈవో ముఖేష్ కుమార్ మీనా విచారణ చేయాలని బాపట్ల జిల్లా కలెక్టర్‌, ఎస్పీలను ఆదేశించారు.

ఈ విచారణలో బీఎల్‌వోలు పోలీసులకు సమాచారం పంపిన విషయం వెలుగుచూసింది. పోలీసుల జోక్యం ఉందని తెలిసినా అధికారులు చర్యలు తీసుకోలేదని పర్చూరు ఎమ్మెల్యే హైకోర్టును ఆశ్రయించారు. దీంతో హైకోర్టు బాధ్యులపై ఏం చర్యలు తీసుకున్నారో తెలియజేయాలని ఆదేశించింది. ఈ నేపథ్యంలో మార్టూరు సీఐ, పర్చూరు, యుద్ధనపూడి, మార్టూరుల ఎస్సైలను సస్పెండ్ చేస్తూ మంగళవారం బాపట్ల జిల్లా ఎస్పీ వకుల్ జిందాల్ ఆదేశాలు ఇచ్చారు.