ఇండియన్ ముజాహిదీన్ లో కూడా ‘ఇండియా’ ఉంది

బీజేపీ పార్లమెంటరీ పార్టీ సమావేశంలో ప్రధాని మోదీ మంగళవారం మాట్లాడుతూ భారత్ ను నాశనం చేసిన కంపెనీలు, దేశంలో విధ్వంసం సృష్టించడం కోసం రూపొందిన ఉగ్రవాద సంస్థల పేర్లలో కూడా `ఇండియా’ అని ఉంటుందని ప్రధాని గుర్తు చేశారు. భారత్ ను వలస పాలనలోకి తీసుకువెళ్లిన ఈస్ట్ ఇండియా కంపెనీ, ఉగ్రవాద సంస్థలు ఇండియన్ ముజాహిదీన్, పీఎఫ్ఐ పేర్లలో కూడా ‘ఇండియా’ ఉంటుందని చెప్పారు. 

స్వాతంత్య్రానికి పూర్వం కాంగ్రెస్ పార్టీని ఇండియన్ నేషనల్ కాంగ్రెస్ అనే పేరుతో ఏఓ హ్యూమ్ అనే బ్రిటిష్ వ్యక్తే స్థాపించాడని ప్రధాని మోదీ తెలిపారు.  వర్షాకాల సమావేశాల్లో అనుసరించాల్సిన వ్యూహం, రానున్న లోక్ సభ ఎన్నికలకు సమాయత్తం కావడంపై పార్లమెంటరీ పార్టీ సమావేశంలో బీజేపీ నాయకులు చర్చించారు.

దేశంలో ప్రతిపక్షం దశ, దిశ లేకుండా ఉందని ప్రధాని మోదీ విమర్శించారు. సైద్ధాంతిక వైరుద్ధ్యాలన్న నాయకులు, రాష్ట్రాల్లో పరస్పరం ప్రత్యర్థులుగా ఉన్న నాయకులు కలిసి `ఇండియా’ అనే పేరుతో కూటమి ఏర్పాటు చేసుకున్నారని విమర్శించారు. ప్రతిపక్షం నిస్పృహలో ఉందని పేర్కొన్నారు.  ఓటమి, నిరాశ, నిస్సహాయంతో అలసిపోయిన ప్రతిపక్షాలకు మోదీని వ్యతిరేకించటం ఒకటే ఎజెండా పెట్టుకున్నాయని అభివర్ణించారు

2024లో ఎన్డీయే దే మళ్లీ విజయమని, వరుసగా మూడోసారి అధికారంలోకి వస్తామని ప్రధాని ధీమా వ్యక్తం చేశారు. ఇక ప్రతిపక్షం శాశ్వతంగా ప్రతిపక్షంలోనే ఉంటుందని చెబుతూ అందుకు ప్రతిపక్షం కూడా సిద్ధంగానే ఉన్నట్లు కనిపిస్తోందని ఎద్దేవా చేశారు. బీజేపీ నాయకత్వంలో దేశంలో నవోదయం సాధ్యమైందని, అంతర్జాతీయంగా భారత్ ప్రతిష్ట ఇనుమడించిందని ప్రధాని మోదీ తెలిపారు.

కాగా, కాంగ్రెస్ మాజీ అధ్యక్షుడు రాహుల్ గాంధీ ప్రధాని వాఖ్యలపై తీవ్రంగా స్పందిస్తూ ”మోదీజీ…మీరు మమ్మల్ని ఏవిధంగానైనా పిలవండి… ఉయ్ ఆర్ ఇండియా” అంటూ ట్వీట్ చేశారు.

మోదీ సర్కారుపై అవిశ్వాస తీర్మానం!