నిఘా వర్గాల సమాచారం మేరకు సోమవారం రాత్రి ముంబై, థానే, పుణెల్లో ఎన్ఐఏ అధికారులు విస్తృతంగా దాడులు నిర్వహించారు. అనంతరం, దక్షిణ ముంబైలోని నాగ్పడ నుంచి తాబిష్ నూర్ సిద్దిఖీ, పుణెలో జుబైర్ నూర్ మొహమ్మద్ షేక్, అబూ నుసైబా, థానెలో షార్జీల్ షేక్ లను అరెస్ట్ చేశారు. వారికి సంబంధించిన ఐదు ప్రాంతాల్లో తనిఖీలు చేశారు.
వారి వద్ద ఉగ్రవాద సాహిత్యం, కొన్ని ఎలక్ట్రానిక్ వస్తువులు, కొన్ని పత్రాలు, ఐసిస్ కు సంబంధించిన మరికొన్ని రహస్య పత్రాలు ఎన్ఐఏ అధికారులకు లభించాయి. భారత్ లో ఐసిస్ ఉగ్రవాద కార్యక్రమాలకు సహకరించడంతో పాటు, యువతను ఐసిస్ ఉగ్రవాద సంస్థలో చేరేలా ప్రోత్సహించడం ఈ నలుగురి ప్రధాన లక్ష్యంగా ఉందని ఎన్ఐఏ అధికారులు వెల్లడించారు.
ఐసిస్, ఐఎస్, ఐసిల్, ఐఎస్కేపీ, ఐసిస్ కే తదితర పేర్లతో భారతదేశంలో ఉగ్రవాద కార్యకలాపాలకు పాల్పడేందుకు వీరు ప్రయత్నిస్తున్నట్లు తేలిందని ఎన్ఐఏ అధికారులు తెలిపారు. వీరు మహారాష్ట్రలో ఐసిస్ కోసం స్లీపర్ సెల్స్ ను నిర్వహిస్తున్నట్లు సమాచారం ఉందని పేర్కొన్నారు.
యువతను ఉగ్రవాద సంస్థలో చేరేలా ప్రోత్సహించడంతో పాటు, వారికి పేలుడు పదార్ధాల తయారీ, రూపకల్పన, చిన్న ఆయుధాల తయారీ, వినియోగం పై వీరు శిక్షణ ఇస్తున్నారని ఎన్ఐఏ అధికారులు వెల్లడించారు. అంతేకాకుండా, వీరు వాయిస్ ఆఫ్ హింద్ పేరుతో ఉన్న మేగజీన్ ను నడుపుతూ ఉగ్రవాద సమాచారాన్ని పంచుకుంటున్నారని తెలిపారు.
More Stories
మణిపూర్ లో 6 పోలింగ్ స్టేషన్లలో రీపోలింగ్
మణిపూర్లో మిలిటెంట్ల దాడిలో ఇద్దరు సీఆర్పీఎఫ్ జవాన్ల మృతి
ఇక ఏడాదిలో రెండుసార్లు సీబీఎస్ఈ పరీక్షలు