ఓఎంఆర్‌ షీట్‌పై హాల్‌టికెట్‌ నెంబర్‌, ఫోటో లేవే?

గ్రూప్‌-1 ప్రిలిమ్స్‌ పరీక్షను దాదాపు 3.80 లక్షల మంది అభ్యర్థులు రాయగా, అందులో కేవలం ముగ్గురు మాత్రమే పిటిషన్‌ వేశారని, మిగతా వారెవరూ అభ్యంతరాలు చెప్పలేదని టీఎస్‌పీఎస్‌సీ వాదించింది. పరీక్షలో ఎలాంటి అక్రమాలు జరగకుండా అన్ని ఏర్పాట్లు జరిగాయని, ఆధార్‌, పాన్‌ వంటి గుర్తింపు కార్డుల ద్వారా ఇన్విజిలేటర్లు అభ్యర్థులను ధ్రువీకరించుకొని పరీక్షను నిర్వహించారని కోర్టుకు టీఎస్‌పీఎస్‌సీ వివరించింది.

అయితే పరీక్షల నిర్వహణలో ఖర్చులు ముఖ్యం కాదని, పారదర్శకంగా పరీక్షలు నిర్వహించడం టీఎస్‌పీఎస్‌సీ చట్టబద్ధమైన బాధ్యతని హైకోర్టు తెలిపింది. అయినా పరీక్షల కోసం అభ్యర్థులు ఫీజు చెల్లిస్తున్నారని కోర్టు ప్రస్తావించింది.

పరీక్షల్లో అక్రమాలను నిరోధించేందుకు ఒకరి బదులు మరొకరు రాయకుండా ఉండేందుకు బయోమెట్రిక్‌, ఫోటో, హాల్‌టికెట్‌ నెంబర్‌ వంటి కీలక అంశాలు అవసరం కదా అని పేర్కొంది. అలాంటి వాటిని విస్మరిస్తే ఎలాని ప్రశ్నించింది. పిటిషన్‌పై మూడు వారాల్లో పూర్తి వివరాలతో కౌంటర్‌ దాఖలు చేయాలని ఆదేశిస్తూ టీఎస్‌పీఎస్‌సీకు హైకోర్టు ఈమేరకు నోటీసులు జారీ చేసింది.