బీజేపీలో చేరిన కాంగ్రెస్ నేత మహేశ్వర్ రెడ్డి

ఏఐసీసీ కార్యక్రమాల కమిటీ ఛైర్మన్‌‌గా ఉన్న మహేశ్వరరెడ్డి గత కొంత కాలం నుంచి టీపీసీసీ చీఫ్ రేవంత్ రెడ్డిని విమర్శిస్తున్నారు. ఈ క్రమంలో బీజేపీకి దగ్గరవుతున్నారని మహేశ్వరరెడ్డికి కాంగ్రెస్‌ పార్టీ రెండు రోజుల క్రితం షోకాజ్‌ నోటీసు జారీ చేసింది. ఈ క్రమంలో తనకు నోటీస్‌ ఇచ్చే అధికారం టీపీసీసీకి లేదని స్పష్టం చేసిన మహేశ్వరరెడ్డి ఆగ్రహం వ్యక్తం చేశారు. ఖర్గేను కలుస్తానని ఢిల్లీ వచ్చారు. అనంతరం జరిగిన పరిణామాలతో బీజేపీలో చేరాలని నిర్ణయించుకున్నారు.

మాజీ మంత్రి, బిజెపి ఎమ్యెల్యే ఈటల రాజేందర్ తో కలిసి గురువారం ఉదయం మహేశ్వర్ రెడ్డి తరుణ్‌ చుగ్‌ నివాసానికి చేరుకుని భేటీ అయ్యారు. బండి సంజయ్, ఈటల రాజేందర్, తరుగ్ చుగ్ తో సమావేశం అనంతరం అక్కడి నుంచి బీజేపీ జాతీయ అధ్యక్షుడు నడ్డాను కలిసి ఆయన సమక్షంలో పార్టీ లో చేరారు.

ఢిల్లీలో బీజేపీ పెద్దలతో సమావేశం కంటే ముందే.. ఏఐసీసీ కార్యక్రమాల అమలు కమిటీ చైర్మన్ ఏలేటి మహేశ్వర్ రెడ్డి కాంగ్రెస్ కు రాజీనామా చేశారు. తన రాజీనామా లేఖను కాంగ్రెస్ జాతీయ అధ్యక్షులు మల్లిఖార్జున ఖర్గేకు పంపించారు.