నాటునాటు పాపులారిటీ విశ్వవ్యాప్తం అయింది

“భారత్ ఎప్పటికీ ఒక కల అని భావించేది.. కానీ ఓ వ్యక్తి విజన్, ధైర్యం, పట్టుదలతోనే ఇది సాకారమైంది. ఇప్పుడు కోట్ల మంది భారతీయుల హృదయాలు గర్వంతో ఉప్పొంగిపోతున్నాయి. ఆర్ఆర్ఆర్ బృందంలోని ప్రతి ఒక్కరికి శిరస్సు వంచి నమస్కరిస్తున్నా ” అంటూ చిరంజీవి ట్వీట్ చేశారు. ఆర్ఆర్ఆర్ మూవీ బృందంపై ఏపీ సీఎం జగన్ మోహన్ రెడ్డి అభినందనలు తెలిపారు. సంగీత ప్రియులను తట్టిలేపిన ‘నాటు నాటు’ పాటకు ఒరిజినల్ సాంగ్ విభాగంలో గౌరవనీయమైన ఆస్కార్ అవార్డును గెలుచుకున్న సంగీత దర్శకుడు ఎంఎం కీరవాణి,  ఆయన బృందానికి అభినందనలు చెప్పారు.

ఆర్ఆర్ఆర్ చిత్రంలోని నాటునాటు పాటకు ఆస్కార్ రావడంపై తెలంగాణ ముఖ్యమంత్రి కెసిఆర్ హర్షం వ్యక్తం చేశారు. విశ్వ సినీ యవనికపై తెలుగు సినిమా సత్తా చాటిందని కొనియాడారు. ప్రతిష్టాత్మక ఆస్కార్ గెలుచుకోవడం తెలుగువారిగా గర్వకారణం అని తెలిపారు. ‘నాటునాటు’ గీతం తెలంగాణ సంస్కృతికి అద్దం పట్టిందని సిఎం కెసిఆర్ పేర్కొన్నారు.

నాటు నాటు గీతం తెలుగు ప్రజల అభిరుచికి నిదర్శనం అన్నారు. తెలుగులోని మట్టి వాసనలను చంద్రబోస్ వెలుగులోకి తెచ్చారని కెసిఆర్ కొనియాడారు. కీరవాణి, చంద్రబోస్ సహా రాజమౌళి బృందానికి సిఎం అభినందనలు తెలిపారు. హాలీవుడ్ కు తీసిపోని విధంగా తెలుగు చిత్రాలు రూపొందదడం గొప్ప విషయం అని కెసిఆర్ పేర్కొన్నారు. తెలుగు సినిమా కీర్తి దిగంతాలకు వ్యాపించిందని ఆయన ప్రశంసలు కురిపించారు. నాటు నాటుకు ఆస్కార్ తెలుగు నేలకే కాదు దేశానికే గర్వకారణమని ప్రశంసించారు.