కొలీజియంలో ప్రభుత్వ ప్రతినిధికి కేంద్రం సూచన

దేశంలోని అన్ని హైకోర్టులతోపాటు సుప్రీంకోర్టులో న్యాయమూర్తుల నియామకాలతో పాటు బదిలీల  ప్రక్రియను ఇప్పటివరకు సుప్రీంకోర్టు ఆధ్వర్యంలోని కొలీజియం చూస్తున్నది. కాగా, ఈ విధానంపై గత కొన్నాళ్లుగా తీవ్ర విమర్శలు, ఆరోపణలు వస్తున్నాయి. అన్ని వర్గాల వారికి సరైన ప్రాతినిధ్యం లభించడం లేదనే అపవాదును కూడా కొలీజియం మూటగట్టుకున్నది.

ఇదే సమయంలో ఎలాంటి రాజకీయలకు తావులేకుండా న్యాయమూర్తుల నియామకాలు జరుగుతున్నాయనే మంచి పేరును కూడా పొందింది. అయితే, కొలీజియంలో పారదర్శకత కరువైందని, జవాబుదారీతనం లేదని, ముఖ్యంగా అన్ని వర్గాలకు న్యాయమూర్తుల నియామకంలో తగు ప్రాతినిధ్యం లభించడం లేదని విమర్శలు కొంతకాలంగా చెలరేగుతున్నాయి.

ఈ నేపథ్యంలో కొలీజియంలో కేంద్ర ప్రభుత్వ ప్రతినిధిని చేర్చేందుకు చర్చలు చేపట్టింది. దీనిలో భాగంగానే కేంద్ర న్యాయశాఖ మంత్రి కిరణ్‌ రిజిజు  సుప్రీంకోర్టు ప్రధాన న్యాయమూర్తి జస్టిస్‌ చంద్రచూడ్‌కు లేఖ రాశారు. కేంద్ర ప్రభుత్వ ప్రతినిధిని కొలీజియంలో భాగస్వామ్యం చేయడం ద్వారా పారదర్శకత, ప్రజలకు జవాబుదారీతనం వస్తుందని సీజేఐకి రాసిన లేఖలో పేర్కొన్నారు. 

సీనియర్లు, ఎంపిక చేసిన న్యాయమూర్తులు మాత్రమే కాకుండా తమకూ ఇందులో సభ్యత్వాన్ని కల్పించాలని కేంద్రం డిమాండ్ చేస్తోంది. ఫలితంగా న్యాయమూర్తుల నియామకాలు, బదిలీల విషయంలో కొలీజియం తీసుకునే నిర్ణయాలు, సిఫారసులను సమీక్షించడానికి అవకాశం ఉంటుందని కేంద్ర ప్రభుత్వం భావిస్తోంది.

న్యాయమూర్తుల నియామకంపై ప్రభుత్వానికి, సుప్రీంకోర్టు కొలీజియానికి మధ్య మాటల యుద్ధం కొనసాగుతున్న నేపథ్యంలో ఈ లేఖ ప్రాధాన్యతను సంతరింప చేసుకోండి. న్యాయవ్యవస్థలో అపారదర్శకత నెలకొందంటూ ఇప్పటికే ఉపరాష్ట్రపతి జగదీప్‌ ధన్‌ఖర్‌ సహా మంపలువురు త్రులు వ్యాఖ్యానిస్తున్నారు.