బీజేపీ ఎదుగుదల చూసి ఓర్వలేకనే టిఆర్ఎస్ విషప్రచారం

ఇకనైనా రాజకీయాలు పక్కనపెట్టి ముఖ్యమంత్రి నవంబర్ 12 నాటి కార్యక్రమానికి హాజరు కావాలని కిషన్ రెడ్డి కోరారు. రాజకీయాల్లో పట్టువిడుపులు సహజమేనని, తెలంగాణ అభివృద్ధి కోసం సీఎం తన హుందాతనాన్ని నిలుపుకోవాలని హితవు చెప్పారు. ప్రధానమంత్రి పార్టీ సంబంధిత కార్యక్రమానికి వస్తుంటే నిరసన తెలిపినా అర్థం ఉంటుందని, తెలంగాణ పురోగతికి సంబంధించిన ప్రాజెక్టును జాతికి అంకితం చేస్తుంటే ఉత్సాహంగా పాల్గొనాల్సింది పోయి విమర్శలు చేయడం సరికాదని స్పష్టం చేశారు.

ముఖ్యమంత్రి ఘర్షణాత్మకమైన వ్యవహారశైలి వల్ల తెలంగాణకు నష్టమే తప్ప లాభం జరగదని పేర్కొంటూ మొండి వాదన, వితండ వాదన వల్ల.. సాధించేది ఏమీ ఉండదని కిషన్ రెడ్డి హెచ్చరించారు. ఇలాంటి పరిస్థితులు తొలగిపోయి తెలంగాణ అభివృద్ధి బాటలు పట్టాలంటే.. మన రాష్ట్రంలోనూ డబుల్ ఇంజన్ సర్కారు ఉండాల్సిన అవసరం ఉందని, కేంద్ర-రాష్ట్ర ప్రభుత్వాలు సంపూర్ణ సమన్వయంతో పనిచేసినపుడు పురోగతి సాధ్యమవుతుందని కిషన్ రెడ్డి పేర్కొన్నారు.

రాజకీయాల్లో సిద్ధాంతపరమైన వైరుధ్యాలు సహజమేనని.. కానీ దేశం, రాష్ట్ర ప్రయోజనాల విషయంలో వీటిని పక్కనబెట్టి పనిచేయాలని ఆయన సూచించారు. తెలంగాణ ప్రజలు అన్నీ గమనిస్తున్నారని, వారు విజ్ఞతతో ఆలోచిస్తున్నారని కిషన్ రెడ్డి అన్నారు. ప్రధానమంత్రి వచ్చినా, కేంద్ర మంత్రులు వచ్చినా, గవర్నర్ విషయంలో రాష్ట్ర ప్రభుత్వం ప్రొటోకాల్ పాటించడం లేని విషయం వాస్తవమా? కాదా? అని కిషన్ రెడ్డి ప్రశ్నించారు.