వందే భార‌త్ రైలుని జెండా ఊపి ప్రారంభించిన ప్ర‌ధాని మోదీ

వందే భార‌త్ రైలును జెండా ఊపి ప్ర‌ధాని న‌రేంద్ర మోదీ  ప్రారంభించారు  . ఈ కార్య‌క్ర‌మం గుజ‌రాత్ లోని గాంధీన‌గ‌ర్ లో జ‌రిగింది. వందే భారత్ రైలులోనే గాంధీ నగర్ నుంచి అహ్మదాబాద్ లోని కలుపూర్ రైల్వే స్టేషన్ వరకు ప్రధాని ప్రయాణించారు. గుజరాత్, మహారాష్ట్ర రాజధాని నగరాలను కలుపుతూ నడిచే ఈ రైలులో ప్రయాణించే వారికి విమానంలో ప్రయాణించిన అనుభూతి కలుగుతుంది. 

ఇది సెమీ హై స్పీడ్ రైలు. మన దేశంలో నడుస్తున్న వందే భారత్ ఎక్స్‌ప్రెస్ రైళ్లలో ఇది మూడోది. మొదటి రైలును న్యూఢిల్లీ-వారణాసి మధ్య నడుపుతున్నారు. మరో రైలును న్యూఢిల్లీ-శ్రీ మాతా వైష్ణో దేవి కాట్రా రూట్‌లో నడుపుతున్నారు.  రైల్వే మంత్రిత్వ శాఖ ఇచ్చిన ట్వీట్‌లో, భావి తరం వందే భారత్ ఎక్స్‌ప్రెస్ రైలును ప్రవేశపెడుతున్నట్లు తెలిపింది. ప్రపంచ స్థాయి ప్రయాణ అనుభూతిని కలిగించేందుకు సిద్ధంగా ఉన్నట్లు తెలిపింది.

గాంధీ నగర్ – ముంబై వందే భారత్ ఎక్స్‌ప్రెస్ రైలు ప్రయాణికులకు అక్టోబరు 1 నుంచి అందుబాటులో ఉంటుంది. ఆదివారాల్లో దీని సేవలు అందుబాటులో ఉండవు. షెడ్యూలు ప్రకారం ఈ రైలు ముంబై సెంట్రల్ స్టేషన్‌ నుంచి ఉదయం 6.10 గంటలకు బయల్దేరుతుంది. అదే రోజు మధ్యాహ్నం 12.30 గంటలకు గాంధీ నగర్ చేరుకుంటుంది.

గాంధీ నగర్‌లో మధ్యాహ్నం 2.05 గంటలకు బయల్దేరి, రాత్రి 8.35 గంటలకు ముంబై సెంట్రల్ స్టేషన్‌కు చేరుతుంది. సూరత్, వడోదర, అహ్మదాబాద్ స్టేషన్లలో ఆగుతుంది. ముంబై నుంచి అహ్మదాబాద్ ఎగ్జిక్యూటివ్ చైర్‌ కార్‌ ప్రయాణానికి ఒక్కొక్కరికి రూ.2,505; చైర్ కార్‌కు రూ.1,385 వసూలు చేస్తారు. ఈ రైలులో 16 బోగీలు ఉంటాయి.