గ్యాంగ్ రేప్ ముందు పబ్ లో ఇంటర్ విద్యార్థుల పార్టీ

రాజకీయ దుమారంకు దారితీస్తున్న జూబ్లీహిల్స్ అమ్నేషియా పబ్ లో జరిగిన పార్టీ ఇంటర్ విద్యార్థులకు వీడ్కోలు పలకడం కోసం జరిగిన్నట్లు పోలీస్ దర్యాప్తులు వెల్లడైన్నట్లు తెలుస్తున్నది. ఓ కార్పొరేట్ స్కూల్ పార్టీ కోసమే ఈ పబ్‌ను బుక్ చేసుకున్నట్టు తెలుస్తోంది. 150 మంది విద్యార్థుల  కోసం ఈ ప‌బ్ బుక్ చేసినట్లుగా ఆరోప‌ణ‌లు వినిపిస్తున్నాయి.

నిషాన్, అయాన్, ఆదిత్య అనే వ్యక్తులు పార్టీ కోసం బుక్ చేసుకున్నట్లు తెలుస్తోంది. ఇందుకోసం వారు రూ.2 లక్షలు కూడా చెల్లించినట్టు సమాచారం. వీరంతా ఇంట‌ర్ రెండో సంవత్సర విద్యార్థులు  అని తెలుస్తోంది.   మే 28న మధ్యాహ్నం 12 గంటల నుంచి సాయంత్రం 5 వరకు పబ్‌లో పార్టీ జరిగినట్లు సమాచారం. పబ్‌లో ఇంటర్ విద్యార్థుల  పార్టీ నిర్వహణ ఏమిటని  విద్యార్ధుల తల్లిదండ్రులతో పాటు, పలువురు  మండిపడుతున్నారు.

హైదరాబాద్ నగరంలో పబ్ ల నిర్వహణ ఎంత విచ్చలవిడిగా సాగుతుందో ఈ విషయం వెల్లడి చేస్తుంది. ఇక ఈ గ్యాంగ్ రేప్   కేసులో అయిదుగురు నిందితులను  గుర్తించగా, ముగ్గురు శ‌నివారం సాయంత్రం కోర్టులో జూబ్లీ హిల్స్ పోలీసులు హాజరుపరిచారు. నిందితుల్లో ఇద్దరు మైనర్లు, ఒక మేజర్‌ కాగా.. ఇద్దరు మైనర్లను జువైనల్‌ హోమ్‌కు తరలించారు. వీరిలో ఒకరు వక్ఫ్‌బోర్డు చైర్మన్‌ కుమారుడు. మరో మైనర్‌ నెల్లూరు పారిపోతుండగా పట్టుకున్నారు.

నిందితుడు మాలిక్‌కు 14 రోజుల జ్యుడీషియల్‌ రిమాండ్‌ను కోర్టు విధించింది. ఐదో నిందితుడైన మైనర్‌ను సంగారెడ్డి ప్రజా ప్రతినిధి కుమారుడిగా పోలీసులు గుర్తించారు. అతడిని శనివారం రాత్రి అదుపులోకి తీసుకుని ప్రశ్నిస్తున్నారు.

మరోవైపు నిందితుల వినియోగించిన ఇన్నోవా ఆచూకీ లభ్యం కావడంతో క్లూస్ టీం నిపుణులతో ఆధారాలు సేక‌రిస్తోంది. కాగా, ఈ కేసుకు సంబంధించి డీజీపీ మహేందర్ రెడ్డిని బీజేపీ నేతలు కలిసి బాలికపై అత్యాచారం కేసును సీబీఐకి బదిలీ చేయాలని వినతిపత్రం సమర్పించారు.