పార్టీ కోసం, ప్రభుత్వం కోసం సమానంగా పని చేస్తున్న ఏకైక నేత మోదీ

బీజేపీ అంటే హిందీ మాట్లాడేవారి పార్టీ అని, కేవలం పట్టణ ప్రాంతాల్లోనే దీనికి పలుకుబడి ఉందని, రైతుల పార్టీ కాదని జరిగిన ప్రచారాలను ఆయన నాయకత్వంలో తిప్పికొట్టగలిగినట్లు తెలిపారు.  మోదీ ప్రభుత్వం ప్రజలు ఇష్టపడటం కోసం కాకుండా, వారికి శ్రేయస్సు కలిగించే నిర్ణయాలను ఎటువంటి రాజకీయ ఆలోచనలు లేకుండా తీసుకుంటుందని అమిత్ షా చెప్పారు.

అద్భుతాలు, కుటుంబ నేపథ్యం, రాజకీయ ప్రాపకం వంటివేవీ లేకుండానే 2014లో మోదీకి భారీ స్థాయిలో ప్రజా తీర్పు వచ్చిందని అయన గుర్తు చేశారు. 2019లో మరోసారి ప్రజాతీర్పు ఇవ్వడం ద్వారా  మోదీని తమ నాయకునిగా ప్రజలు ఆమోదించారని స్పష్టమవుతోందని అమిత్ షా తెలిపారు.

ఈ పుస్తకంలో మోదీ చిన్న కార్యకర్త నుంచి అత్యంత ఆదరణ పొందిన నేతగా ఎలా ఎదిగారనే విషయాన్ని తెలియజేస్తుందని చెప్పారు.  ఆటోల్లో, బస్సుల్లో ప్రతి గ్రామానికి తిరిగి.. పేద వారితో కలిసి భోజనం చేసిన అనుభవశాలి మోదీ అని కొనియాడారు. మోదీ  ముఖ్యమంత్రిగా బాధ్యతలు చేపట్టే నాటికి కనీసం గ్రామాన్ని పాలించిన అనుభవం కూడా లేదని ఆయన గుర్తు చేసారు.

కానీ, ఆ తర్వాత ప్రతి ఎన్నికల్లో గెలిచి గుజరాత్ రాష్ట్రాన్ని సమర్థవంతంగా పాలించారని అమిత్ షా వివరించారు.  మోదీ దేశ ప్రజల కోసం ఎలా పెద్ద కలలు కంటున్నారు.. కోట్లాది మందిని ప్రభావితం చేసే ఆ కలలను ఏ విధంగా ఆచరణలో పెట్టగలుగుతున్నారనే విషయాలను ఈ పుస్తకంలో చక్కగా వివరించారని వెంకయ్య నాయుడు అభినందించారు. 

బ్లూక్రాఫ్ట్ డిజిటల్ ఫౌండేషన్ సంకలనం చేసిన ఈ గ్రంధంలో నరేంద్ర మోదీ గుజరాత్ ముఖ్యమంత్రిగా, భారత దేశ ప్రధాన మంత్రిగా 20 ఏళ్ళ నుంచి అమలు చేస్తున్న పరిపాలన విధానాన్ని ఈ పుస్తకంలో వివరించారు.  అమిత్ షా, అజిత్ దోవల్, సుధా మూర్తి, నందన్ నీలేకని, అరవింద్ పనగారియా, సుబ్రహ్మణ్యం జైశంకర్, లతా మంగేష్కర్, పీవీ సింధు, నృపేంద్ర మిశ్రా వంటివారు రాసిన వ్యాసాలను దీనిలో పొందుపరిచారు.