బలగాలు పూర్తిగా వైదొలగితేనే సరిహద్దుల్లో శాంతి

 సైన్యాన్ని ఉపసంహరిస్తేనే ఇరు దేశాల సరిహద్దుల్లో సాధారణ పరిస్థితి నెలకొంటుందని ఆయన స్పష్టం చేశారు. 2020 ఏప్రిల్ తర్వాత చైనా చర్యల వల్ల ఇరు దేశాల మధ్య సంబంధాల్లో చాలా ఇబ్బందులు తలెత్తాయని ఆయన తెలిపారు.

తూర్పు లడఖ్ వివాదంపై ఇప్పటివరకు ఇరు దేశాల సైనికాధికారుల మధ్య 15 దఫాలు చర్చలు జరిగాయని, ఈ చర్చల్లో కొంత మేరకు పురోగతి సాధించామని పేర్కొన్నారు.  అయితే ఇది ఆశించిన స్థాయికన్నా నిదానంగా ఉందని జైశంకర్ అసంతృప్తి వ్యక్తం చేశారు.

ఇప్పటికీ ఘర్షణ ప్రాంతాలు ఉన్నాయని చెబుతూ పాంగాంగ్ సో సహా కొన్ని ఘర్షణ ప్రాంతాల్లో సమస్యను పరిష్కరించుకోవడంలో పురోగతి సాధించినట్లు తెలిపారు. దీనిని ఏ విధంగా ముందుకు తీసుకెళ్ళాలనేదానిపై నేడు చర్చించామని చెప్పారు. కాగా,  క్వాడ్ (భారత్, అమెరికా, ఆస్ట్రేలియా, జపాన్) దేశాల సమావేశం గురించి వాంగ్ యీతో చర్చించలేదని తెలిపారు.

ఆఫ్ఘనిస్థాన్, ఉక్రెయిన్ సహా ముఖ్యమైన అంతర్జాతీయ సమస్యలపై అభిప్రాయాలను వ్యక్తం చేయడానికి ఈ సమావేశం దోహదపడిందని చెప్పారు.  ఆఫ్ఘనిస్థాన్ విషయంలో భారత దేశ వైఖరి ఐక్యరాజ్య సమితి భద్రతా మండలి తీర్మానం 2593కు అనుగుణంగా ఉంటుందని చెప్పారు. ఉక్రెయిన్ విషయంలో తమ దృక్పథాన్ని, వైఖరిని తెలియజేశామని, అయితే దౌత్యం, చర్చలకు ప్రాధాన్యం ఇవ్వాలని ఇరువురం అంగీకరించామని చెప్పారు.

చైనాలో చదువుతున్న విద్యార్థులు అనుభవిస్తున్న ఇబ్బందుల గురించి వాంగ్ యీతో చర్చించినట్లు జైశంకర్ తెలిపారు. కరోనా  ఆంక్షల సాకుతో మన దేశ విద్యార్థులను తిరిగి చైనాకు రానివ్వడం లేదని,  అనేకమంది భవిష్యత్తుకు సంబంధించిన అంశమైనందువల్ల ఎటువంటి వివక్ష లేకుండా చైనా తగిన చర్యలు తీసుకుంటుందని ఆశిస్తున్నట్లు తెలిపారు.