బోధన్ లో శివాజీ విగ్రహంపై రణరంగం.. బంద్‌కు బీజేపీ పిలుపు

నిజామాబాద్‌ జిల్లా బోధన్‌లో శివాజీ విగ్రహ ఏర్పాటుపై వివాదం చెలరేగింది.  రెండు వర్గాల మధ్య తీవ్ర ఉద్రిక్తతకు దారితీసింది. శనివారం అర్ధరాత్రి విగ్రహాన్ని ఏర్పాటు చేసారని అంటూ  ఓ వర్గం వారు అభ్యంతరం తెలిపారు. దీంతో ఇరు వర్గాల మధ్య ఘర్షణ చోటుచేసుకొంది. రెండు వర్గాల వారు పరస్పరం రాళ్లు రువ్వుకున్నారు. 

దీంతో విగ్రహ ప్రాంతం రణరంగాన్ని తలపించింది. పరిస్థితి చేయిజారి పోతుండడంతో పోలీసులు లాఠీచార్జి, బాష్పవాయువు ప్రయోగించి ఇరు వర్గాల వారిని తరిమికొట్టారు. పరిస్థితులు అదుపులోకి వచ్చే వరకు 144 సెక్షన్‌ విధించారు. పట్టణంలో భారీ బందోబస్తు ఏర్పాటు చేశారు. విగ్రహం వద్ద పోలీస్‌ పికెట్‌ ఏర్పాటు చేశారు. 

మునిసిపల్ తీర్మానంతో ఏర్పాటు చేసిన శివాజీ విగ్రహం గురించి ఈ రసభ ఏమిటని అంటూ బిజెపి నేతలు ఆగ్రహం వ్యక్తం చేశారు. నిరసనగా సోమవారం బోధన్ బంద్‌కు బీజేపీ పిలుపునిచ్చింది. బంద్‌ను విజయవంతం చేయాలని ఆ పార్టీ శ్రేణులను కోరారు.

నగర పోలీసు కమిషనర్‌ కేఆర్‌ నాగరాజు జిల్లాలోని ఇతర ప్రాంతాల నుంచి బలగాలను రప్పించారు. ఇరు వర్గాలకు నచ్చజెప్పే ప్రయ త్నం చేసినా వినలేదు. దీంతో పోలీసులు టియర్‌గ్యాస్‌ వదిలి రెండు వర్గాల వారిని చెదరగొట్టారు. అంబేడ్కర్‌ చౌరస్తా వద్ద భారీగా పోలీసులను మోహరించారు. విగ్రహం వద్ద పోలీసు పికెట్‌ ఏర్పాటు చేశారు.