ఏడేళ్లలో ఈశాన్య ప్రాంతం పరిస్థితి మార్చేసిన బిజెపి

తాను అధికారం చేపట్టకముందే ఈశాన్య ప్రాంతంలోని సామర్ధ్యాన్ని గ్రహించానని, అందుకనే తాము అధికారంలోకి రాగానే ఈ ప్రాంతపు అభివృద్ధి పట్ల ప్రత్యేక దృష్టి సారించామని ప్రధాని చెప్పారు. ఈశాన్యప్రాంతం, ముఖ్యంగా మణిపూర్ లో జరిగిన అభివృద్ధిలో గత ఏడేళ్లుగా బిజెపి ప్రభుత్వం చేస్తున్న కృషి స్పష్టంగా కనిపిస్తోందని ఆయన తెలిపారు. 

భారతదేశ అభివృద్ధిలో ఈశాన్య ప్రాంతం, మణిపూర్ గొప్ప పాత్ర పోషిస్తున్నాయని చెబుతూ ఇక్కడ ప్రారంభించిన అభివృద్ధి ప్రాజెక్టులు మణిపూర్ ప్రజల జీవితాలను సులభతరం చేస్తాయని ప్రధాని ఆశాభావం వ్యక్తం చేశారు. బీజేపీ అధికారంలోకి వచ్చిన తర్వాత మణిపూర్ అభివృద్ధి పూర్తిగా మారిపోయిందని స్పష్టం చేశారు.

 ‘తౌబాల్ బహుళ ప్రయోజన ప్రాజెక్ట్ నీటి ప్రసార వ్యవస్థ’తో సహా ఈరోజు ప్రారంభించిన  ప్రాజెక్టులు ఈ ప్రాంతంలో తాగునీటి సరఫరాను అందించగలవని మోదీ  చెప్పారు. ఒకప్పుడు మణిపూర్‌లో కేవలం 6 శాతం కుటుంబాలు మాత్రమే స్వచ్ఛమైన తాగునీరు పొందేవారని, నేడు 60 శాతానికి పైగా ప్రజలు స్వచ్ఛమైన నీటిని పొందుతున్నారని, త్వరలో ఈ ప్రాంతంలో 100 శాతం సాధిస్తామని మోదీ వెల్లడించారు.