బెంగాల్ లో టిఎంసి, ఈశాన్యంలో బిజెపి, హిమాచల్ లో కాంగ్రెస్

పశ్చిమ బెంగాల్ లోఎన్నిక‌లు జ‌రిగిన నాలుగు స్థానాల్లోనూ టిఎంసి విజ‌య దుందుబీ మోగించింది. దిన్‌హ‌టా నియోజ‌క‌వ‌ర్గం నుంచి తృణ‌మూల్ అభ్య‌ర్థి ఉద‌య‌న్ గుహ 1,64,089 ఓట్ల తేడాతో బీజేపీ అభ్య‌ర్థి అశోక్‌పై నెగ్గారు. ఇక గోసాబా స్థానం నుంచి సుబ్ర‌తో మోండ‌ల్ 1,43,051 ఓట్ల తేడాతో  బీజేపీకి చెందిన ప‌లాషా రాణాపై గెలుపొందారు. శాంతిపూర్ నుంచి బ్ర‌జ కిశోర్ గోస్వామి 64,675 ఓట్ల తేడాతో బీజేపీ నేత నిరంజ‌న్‌పై విజ‌యం సాధించింది. ఖ‌ర్దా సీటు నుంచి తృణ‌మూల్ నేత 93832 ఓట్ల తేడాతో బీజేపీ అభ్య‌ర్థి జోయ్ షాపై గెలుపొందారు.

హిమాచ‌ల్ ప్ర‌దేశ్ ఉప ఎన్నిక‌ల్లో అధికారంలో ఉన్న బిజెపి పోటీ చేసిన అన్ని సీట్ల‌ను కోల్పోయింది. మండి లోక్‌స‌భ స్థానం నుంచి కాంగ్రెస్ అభ్య‌ర్థి ప్ర‌తిభా సింగ్‌.. బీజేపీ అభ్య‌ర్థి కుషాల్ ఠాకూర్‌పై గెలుపొందారు. దాదాపు ప‌ది వేల ఓట్ల తేడాతో బ్రిగేడియ‌ర్ కుషాల్ ఓట‌మి పాల‌య్యారు. ఇక ఫ‌తేపూర్‌, ఆర్కీ, జుబ్బ‌ల్ అసెంబ్లీ స్థానాల‌ను కూడా కాంగ్రెస్ పార్టీ కైవ‌సం చేసుకున్న‌ది. ఫ‌తేపూర్ నుంచి భ‌వానీ సింగ్‌, ఆర్కీ నుంచి సంజ‌య్‌, జుబ్బ‌ల్ నుంచి రోహిత్ ఠాకూర్‌లు గెలుపొందారు.

ఇక, రాజస్థాన్‌లోని ధరియావాడ్, వల్లభ్‌నగర్ అసెంబ్లీ నియోజకవర్గాల్లో కాంగ్రెస్ అభ్యర్థులు విజయం దిశగా దూసుకుపోతున్నారు. తాజా ట్రెండ్స్ ప్రకారం, నాగరాజ్ మీనా ధరియావాడ్‌లో బిజెపి అభ్యర్థి ఖేత్ సింగ్ మీనాపై 1,21,43 ఓట్ల ఆధిక్యంలో ఉండగా, వల్లభనగర్‌లో, ప్రీతీ శక్తావత్ రాష్ట్రీయ లోక్తాంత్రిక్ పార్టీ (ఆర్ ఎల్ పి) అభ్యర్థి ఉదయలాల్ డాంగి కంటే 6,501 ఓట్ల  ఆధిక్యంలో ఉన్నారు.   

ఈశాన్యంలో అన్ని సీట్లలో ఎన్డీయే 

ఈశాన్య రాష్ట్రాలలో అన్ని సీట్లను ఎన్డీయే గెల్చుకొంటున్నది.  అస్సాంలోని నాలుగు స్థానాల్లో బీజేపీ తౌరాలో పొందగా, మిగిలిన స్థానాలలో  మిత్రపక్షాలతో కలిసి ఆధిక్యంలో ఉంది. కాంగ్రెస్ నుంచి మారిన బీజేపీ అభ్యర్థి సుశాంత బోర్గోహైన్ 30,561 ఓట్ల ఆధిక్యతతో తౌరా స్థానంలో మూడోసారి విజయం సాధించారు.

బీజేపీ అభ్యర్థులు ఫణిధర్ తాలూక్దార్ (భబానీపూర్), రూపజ్యోతి కుర్మి (మరియానీ) తిరుగులేని ఆధిక్యంలో ఉన్నారు. బిజెపి మిత్రపక్షమైన యుపిపిఎల్ అభ్యర్థి జిరోన్ బసుమతరీ గోస్సైగావ్ (బోడో టెరిటోరియల్ రీజియన్‌లో భాగం) స్థానంలో కాంగ్రెస్‌కు చెందిన జోవెల్ తుడుపై 28,252 ఓట్ల తేడాతో గెలుపొందారు. అదే సమయంలో, యుపిపిఎల్‌కు చెందిన జోలెన్ డైమరీ తముల్‌పూర్‌లో ముందంజలో ఉంది.

తౌరా స్థానంలో, బిజెపికి చెందిన బోర్గోహైన్ 54,956 ఓట్లు సాధించగా, స్వతంత్ర అభ్యర్థిగా పోటీ చేసిన అతని సమీప ప్రత్యర్థి రైజోర్ దళ్ కు చెందిన ధైజ్య కొన్వార్ 24,395 ఓట్లను పొందగలిగారు. 2011లో శివసాగర్ జిల్లాలోని తౌరా నియోజకవర్గం నుంచి తొలిసారిగా ఎమ్మెల్యేగా ఎన్నికైన బోర్గోహైన్, పార్టీలో “మారిన అంతర్గత రాజకీయ వాతావరణం” కారణంగా జూలై 30న కాంగ్రెస్‌కు రాజీనామా చేశారు.

మేఘాలయలో, అధికార పార్టీ ఎన్ పి పి  రాజబాలా అసెంబ్లీ నియోజకవర్గంలో దాని అభ్యర్థిగా గెలిచింది, మొహమ్మద్అ బ్దుస్ సలేహ్ తన సమీప ప్రత్యర్థి కాంగ్రెస్‌కు చెందిన హషీనా యాష్మిన్ మొండల్‌పై 1,900 ఓట్ల ఆధిక్యతతో విజయం సాధించారు.

నేషనల్ పీపుల్స్ పార్టీ అభ్యర్థికి 11,823 ఓట్లు రాగా, మోండల్‌కు 9,897 ఓట్లు వచ్చాయి. యునైటెడ్ డెమోక్రటిక్ పార్టీకి చెందిన అషాహెల్ డి షిరా 7,247 ఓట్లతో మూడో స్థానంలో నిలిచారు. మవ్రింగ్‌క్‌నెంగ్‌లో ఎన్‌పిపికి చెందిన పినియాయిడ్ సింగ్ సియెమ్ తన సమీప కాంగ్రెస్ ప్రత్యర్థి హైలాండర్ ఖర్మల్కీ కంటే 1,816 ఓట్ల తేడాతో ఆధిక్యంలో ఉన్నారు.

బీహార్ లో అధికార జెడియు అభ్యర్థి అమన్ భూషణ్ హజారీ సమీప ఆర్జేడీ అభ్యర్థి గణేష్ భారతిపై 12 వేల ఓట్ల ఆధిక్యతతో గెలుపొందారు. హాజరీ తండ్రి మరణంతో ఈ ఉపఎన్నిక జరిగింది. ఆయనకు 58,882 ఓట్లు  రాగా, ఆర్జేడీ అభ్యర్థి గణేష్ భారతికి 47,184 ఓట్లు వచ్చాయి.

ఇలా ఉండగా, జెడియు అభ్యర్థి మెవలాల్ చౌదరి మృతితో జరిగిన తారాపూర్ ఉపఎన్నికలో ఆ పార్టీ అభ్యర్థి రాజీవ్ కుమార్ సింగ్ ఆర్జేడీ  అభ్యర్థి అరుణ్ కుమార్ సాహ్ కంటే 2,000 కంటే తక్కువ ఓట్ల తేడాతో వెనుకంజలో ఉన్నారు.

దాద్రా, నగర్ హవేలీ లోక్‌సభ స్థానానికి జరిగిన ఉప ఎన్నికలో   శివసేన అభ్యర్థి, మాజీ స్వతంత్ర ఎంపీ దివంగత మోహన్ డెల్కర్ సతీమణి కాలాబెన్ డెల్కర్ 15 వేల ఓట్ల ఆధిక్యంలో ఉన్నారు. ఆమెకు ఇప్పటివరకు 44,723 ఓట్లు రాగా, ఆమె సమీప ప్రత్యర్థి, బీజేపీ అభ్యర్థి మహేశ్ గవిత్ 29,388 ఓట్లతో వెనుకంజలో ఉన్నారు. కాంగ్రెస్ అభ్యర్థి మహేశ్ ధోడీకి ఇప్పటివరకు 1,947 ఓట్లు వచ్చాయని ఎన్నికల సంఘం అధికారి ఒకరు తెలిపారు.

మధ్యప్రదేశ్‌లో బీజేపీ 

మధ్యప్రదేశ్‌లోని నాలుగు స్థానాలకు జరిగిన ఉప ఎన్నికల ఓట్ల లెక్కింపు  జరుగుతుండగా, ఖాండ్వా లోక్‌సభ నియోజకవర్గంతో పాటు మరో మూడు అసెంబ్లీ నియోజకవర్గాల్లో బీజేపీ ఆధిక్యంలో ఉంది.

ఖాండ్వా లోక్‌సభ స్థానంలో బీజేపీ అభ్యర్థి జ్ఞానేశ్వర్ పాటిల్ తన ప్రత్యర్థి కాంగ్రెస్ అభ్యర్థి రాజనారాయణ్ సింగ్ పూర్ణిపై 14,365 ఓట్ల ఆధిక్యంలో ఉన్నారు. సత్నా జిల్లాలోని రాయగావ్ అసెంబ్లీ స్థానంలో (ఎస్సీకి రిజర్వ్ ) కాంగ్రెస్ అభ్యర్థి కల్పనా వర్మపై బీజేపీ అభ్యర్థి ప్రతిమా బగ్రీ 220 ఓట్ల ఆధిక్యంలో ఉన్నారు.

నివారి జిల్లాలోని పృథ్వీపూర్ అసెంబ్లీ స్థానంలో, బిజెపికి చెందిన శిశుపాల్ సింగ్ యాదవ్ తన ప్రత్యర్థి కాంగ్రెస్ ప్రత్యర్థి నితేంద్ర సింగ్ రాథోడ్ కంటే 430 ఓట్ల ఆధిక్యంలో ఉండగా, అలీరాజ్‌పూర్ జిల్లాలోని జోబాట్ (ఎస్‌టికి రిజర్వ్ చేయబడింది) స్థానంలో, బిజెపికి చెందిన సులోచన రావత్ కాంగ్రెస్ కంటే 1,956 ఓట్ల ఆధిక్యంలో ఉన్నారు.