కేంద్రం సాయాన్ని, ప్రధాని మోదీ చేయూతను మరువలేం

రెండేళ్లలో ఆంధ్రప్రదేశ్‌లో జరిగిన అభివృద్ధి నిజంగా నమ్మశక్యం కాని స్థాయిలో ఉందని బిజెపి రాష్ట్ర అధ్యక్షుడు పీవీఎన్ మాధవ్ పేర్కొన్నారు. ప్రపంచంలో ఎక్కడా లేని విధంగా రాష్ట్రానికి భారీ స్థాయిలో పెట్టుబడులు వచ్చాయని చెప్పారు. కేవలం రెండు సంవత్సరాల్లోనే రూ.14 లక్షల కోట్ల పెట్టుబడులు రాష్ట్రానికి రావడం విశేషమని తెలిపారు. ప్రపంచంలో అతిపెద్ద సంస్థల్లో ఒకటైన గూగుల్ తన దేశం వెలుపల అత్యధిక పెట్టుబడులు పెట్టేందుకు విశాఖపట్నాన్ని ఎంపిక చేసుకోవడం రాష్ట్ర ప్రతిష్ఠను పెంచిందని చెప్పారు.

గతంలో విశాఖ ఉక్కు కర్మాగారం సంక్షోభంలో ఉన్నప్పుడు అటల్ బిహారీ వాజ్‌పేయి, చంద్రబాబు నాయుడు కలిసి దానిని రక్షించారని మాధవ్ గుర్తు చేశారు. ప్రస్తుతం మరోసారి సమస్యలు ఎదురైన నేపథ్యంలో కేంద్ర ప్రభుత్వం మూలధన సహాయం అందించి కర్మాగారాన్ని నిలబెట్టేందుకు చర్యలు చేపట్టిందని చెప్పారు. దేశంలో మరే ప్రభుత్వ రంగ సంస్థకు ఇవ్వని విధంగా రూ.11,414 కోట్ల పునరుద్ధరణ ప్యాకేజీని విశాఖ ఉక్కు కర్మాగారానికి అందించారని తెలిపారు.