భారతదేశాన్ని నక్సల్ రహిత దేశంగా మార్చడం ఓ ప్రధాన విజయం

“మరికొన్ని గంటల్లో మనం 80వ స్వాతంత్య్ర దినోత్సవ వేడుకలు వైభవంగా జరుగనున్నాయి. దేశ ప్రజలతో పాటు విదేశాల్లోని భారతీయులు సైతం జెండా పండుగలో సగర్వంగా పాల్గొననున్నారు. మన మూడు రంగుల జెండా స్వాతంత్య్రానికి ప్రతీక. ఈ పతాకాన్ని మనం ఎంతో గౌరవంతో ఎగురవేస్తాం. 1947, ఆగస్టు15వ తేదీన బ్రిటీష్‌వారి కబంద హస్తాల నుంచి మన నేలకు స్వేచ్ఛ లభించింది” అని తెలిపారు. 

“మనదేశంలోని విద్యార్థులు, టీచర్లు, శాస్త్రవేత్తలు, ఇంజనీర్లు అభివృద్ధి కోసం ఆతృతగా ఉన్నారు. అలానే వైద్యులు, వైద్యరంగంలోని సిబ్బంది ఆరోగ్య రంగంలో కృషి చేస్తున్నారు. రైతులు పంటలు పండించడం ద్వారా దేశ నిర్మాణంలో భాగమవుతున్నారు. మిగతా రంగాల్లోని వారు సైతం రాజ్యాంగంలోని ప్రాథమిక విధులను నిర్వర్తిస్తున్నారు. వారందరిని నేను మనస్ఫూర్తిగా అభినందిస్తున్నా” అని చెప్పారు. 

ఘనమైన వారసత్వ సంపద, స్వాతంత్య్ర పోరాటంలోని ఆశయాలనుంచి మనం ఆధునిక యుగంలో అడుగుపెట్టామని రాష్ట్రపతి పేర్కొంటూ  ‘వయం రాష్ట్రీ జగ్రియమ్’ అనే వేదవాక్కు మనందరినీ దేశం పట్ల జాగరూకతతో ఉండడంలో స్ఫూర్తినిస్తుందని తెలిపారు.  “ఈరోజు ఆగస్టు 14. ఈ రోజును విభజన భయానక దృశ్యాలను గుర్తుచేసుకునే రోజు. విభజన సమయంలో చెలరేగిన మతపరమైన హింస కారణంగా లక్షలాది మంది బలవంతంగా శరణార్ధులుగా మారారు. అయినా సరే ఇప్పటికీ వారు తమ గుర్తింపును మాత్రం వదులుకోలేదు” అని ఆమె స్పష్టం చేశారు.

“ప్రజల ఆశయాలు చట్టసభల్లో తెలియజేయడం ప్రజాప్రతినిధుల బాధ్యత. పౌరులు, దేశ ప్రయోజనాలను దృష్టిలో పెట్టుకొని విధానాలు రూపొందించాల్సిన బాధ్యత చట్టాలను అమలు చేసేవాళ్లపై ఉంది. ఏ ఒక్కరు కూడా న్యాయానికి దూరమవ్వకుండా చూడాల్సిన బాధ్యత న్యాయ వ్యవస్థలోని ప్రతి ఒక్కరిపై ఉంది” అని ఆమె తెలిపారు. గత దశాబ్దంలో మన దేశం ఎంతో వేగంగా సమ్మిళిత వృద్ధిని సాధించిందని చెబుతూ వారసత్వం, అభివృద్ధిని సమన్వయం చేసుకుంటూ దశాబ్దాల నాటి అడ్డంకులను తొలగించామని రాష్ట్రపతి చెప్పారు.

“మహాత్మా జ్యోతిబా ఫూలే 200వ జయంతిని నిర్వహించుకున్నాం. విద్య, సమానత్వం, సామాజిక న్యాయం, మహిళా సాధికారత వంటి అంశాల్లో ఫూలే, సావిత్రిబాయి ఫూలే దంపతులు చరిత్రాత్మకమైన కృషి చేశారు. వారి స్ఫూర్తితోనే అణగారిన వర్గాల అభివృద్ధికి ఈమధ్య ప్రాధాన్యం ఇస్తున్నాం. 25 కోట్ల మందిని పేదరికం నుంచి బయటపడేశాం” అని ఆమె గుర్తు చేశారు.