* జ్ఞానేష్ కుమార్ ను తొలగించాలి, అరెస్ట్ చేయాలి.. ప్రతిపక్షాల డిమాండ్
తమకు తెలియకుండా తీసుకున్న నిర్ణయాలపై భారత ఎన్నికల సంఘంలోని ముగ్గురు సభ్యులలో ఇద్దరు పది నెలల వ్యవధిలో కనీసం 14 సార్లు రికార్డు స్థాయిలో అభ్యంతరం వ్యక్తం చేశారంటూ ‘ది ఇండియన్ ఎక్స్ప్రెస్’ ప్రచురించిన పరిశోధనాత్మక కథనం రాజకీయ దుమారాన్ని రేపింది. ఈ కధనాన్ని తోసిపుచ్చుతూ భిన్నాభిప్రాయాలు పరిశీలనలోకి వచ్చాయి గాని, అన్ని నిర్ణయాలు సమిష్టిగా జరిగాయని స్పష్టం చేయగా, ప్రతిపక్షాలు `ఓట్ల చోరీ’ అంటూ విమర్శలు గుప్పించాయి. ప్రధాన ఎన్నికల కమిషనర్ (సీఈసీ) జ్ఞానేష్ కుమార్ ‘ఏకపక్ష నిరంకుశత్వానికి’ పాల్పడుతున్నారని ప్రతిపక్షాలు ఆరోపిస్తూ ఆయనను తొలగించాలని డిమాండ్ చేశాయి.
2014లో నరేంద్ర మోదీ ప్రధానమంత్రి అయినప్పటి నుండి దేశంలో ఎన్నికలు సజావుగా జరిగాయని పేర్కొంటూ ఎన్నికల సంఘంపై ప్రతిపక్షాలు చేస్తున్న ‘ఓట్ల చోరీ’ ఆరోపణలను బీజేపీ జాతీయ అధికార ప్రతినిధి సంబిత్ పాత్ర తిరస్కరించారు. ప్రజా మద్దతు పొందడంలో విఫలమైన తర్వాత రాజ్యాంగ సంస్థలను ప్రశ్నిస్తున్నారని ఆరోపిస్తూ, పాత్ర ప్రతిపక్ష పార్టీలను, ముఖ్యంగా కాంగ్రెస్ను లక్ష్యంగా చేసుకున్నారు.
ఎన్నికల సంఘం తీసుకున్న నిర్ణయాలపై ఎన్నికల కమిషనర్లు సుఖ్బీర్ సింగ్ సంధు, వివేక్ జోషి అభ్యంతరాలు వ్యక్తం చేశారన్న వార్తలపై వివాదం చెలరేగిన నేపథ్యంలో ఆయన ఈ వ్యాఖ్యలు చేశారు. ఓటరు నమోదు, పేర్ల తొలగింపు, ఫారం 6, ఓటరు డేటాకు ప్రాప్యత వంటి అంశాలపై ఈ ఇద్దరు కమిషనర్లు 10 నెలల వ్యవధిలో కనీసం 14 సార్లు అభ్యంతరాలు నమోదు చేశారని ఇండియన్ ఎక్స్ప్రెస్ నివేదిక పేర్కొంది.
ఇటువంటి అంతర్గత చర్చలు, భిన్నాభిప్రాయాలు నిర్ణయాలు తీసుకునే ప్రక్రియలో సాధారణమేనని, తమ తుది నిర్ణయాలు ఏకగ్రీవంగా ఉంటాయని ఎన్నికల సంఘం స్పష్టం చేసింది. 2014 నుండి ప్రజలు ప్రతిపక్షాన్ని పదేపదే తిరస్కరించారని చెబుతూ ప్రజా మద్దతు పొందడంలో కాంగ్రెస్, దాని మిత్రపక్షాలు విఫలమైన తర్వాత, వారు రాజ్యాంగ సంస్థలపై ప్రణాళికాబద్ధమైన దాడులు ప్రారంభించారని పాత్ర ఆరోపించారు.
ఎన్నికల ఓటముల పట్ల నిరాశతో ప్రతిపక్ష పార్టీలు ఎన్నికల సంఘం నిష్పక్షపాతాన్ని ప్రశ్నిస్తున్నాయని, అలాగే ‘ఓట్ల చోరీ’ వంటి తప్పుదోవ పట్టించే వాదనలను ప్రచారం చేస్తున్నాయని కూడా ఆయన ఆరోపించారు. ఎన్నికల సంఘం వివరణాత్మక నోట్ను ప్రస్తావిస్తూ, ఎన్నికల సంఘంలో నిర్ణయాలు ప్రజాస్వామ్యబద్ధంగా, ఏకగ్రీవంగా తీసుకున్నారని పాత్రా స్పష్టం
“ఎన్నికల సంఘంలోని కమిషనర్లందరి మధ్య అధికారిక చర్చలు, సంప్రదింపులు జరుగుతాయని ఆ సంఘం తాజా నోట్ రుజువు చేస్తోంది. సుదీర్ఘ చర్చల తర్వాత, కమిషనర్లందరూ ఒకే అభిప్రాయానికి వస్తారు.” అని పేర్కొన్నారు. “ముగ్గురు ఎన్నికల కమిషనర్లు ఒకరితో ఒకరు మాట్లాడుకోకుండా, అభిప్రాయాలు పంచుకోకుండా, చర్చించుకోకుండా, ప్రతిదానికీ కేవలం అంగీకరిస్తే, ప్రతిపక్ష పార్టీలు దానిని నియంతృత్వం అని పిలుస్తాయి” అని ఎద్దేవా చేశారు.
కాగా, `ది ఇండియన్ ఎక్స్ప్రెస్‘లో కథనం వచ్చిన కొద్ది గంటలకే, లోక్సభలో ప్రతిపక్ష నాయకుడు రాహుల్ గాంధీ అధికార బీజేపీ, ఎన్నికల సంఘంపై దేశద్రోహానికి పాల్పడ్డాయని ఆరోపించారు. “ఓట్ల చోరీ అనేది భారత ప్రజలకు వ్యతిరేకంగా చేసే నేరం. మన రాజ్యాంగంపై జరిగిన ప్రత్యక్ష దాడి. దీనిని నిర్వహించిన బీజేపీ, ఆర్ఎస్ఎస్, ఎన్నికల సంఘం దేశద్రోహానికి పాల్పడ్డాయి. ఖచ్చితంగా న్యాయం జరుగుతుంది,” అని ఆయన ‘ఎక్స్’ వేదికగా పేర్కొన్నారు.
పశ్చిమ బెంగాల్లో మళ్లీ అసెంబ్లీ ఎన్నికలు నిర్వహించాలని ఆ రాష్ట్ర మాజీ ముఖ్యమంత్రి, ఏఐటీసీ (టీఎంసీ) అధినేత్రి మమతా బెనర్జీ డిమాండ్ చేశారు. అంతేకాదు కేంద్ర ఎన్నికల సంఘం ప్రధాన అధికారి (సీఈసీ) జ్ఞానేశ్వర్ కుమార్ను అరెస్టు చేయాలని ఆమె డిమాండ్ చేశారు. పశ్చిమ బెంగాల్ను దక్కించుకునేందుకు, టీఎంసీని ఓడించేందుకే కేంద్ర ప్రభుత్వం సర్ ప్రక్రియను ప్రారంభించందని మమత ఆరోపించారు.
ఇటీవలి సంవత్సరాలలో ఎన్నికల సంఘం తీసుకున్న అన్ని నిర్ణయాలను పార్లమెంటరీ కమిటీ సమీక్షించాలని సీనియర్ కాంగ్రెస్ నాయకుడు పి. చిదంబరం కోరారు. ఎస్ఐఆర్ ప్రక్రియను తక్షణమే నిలిపివేయాలని కూడా ఆయన డిమాండ్ చేశారు.
ఎస్ఐఆర్ ప్రక్రియపై ఎన్నికల సంఘంలో అంతర్గత విభేదాలు ఉన్నాయన్న వార్తల నేపథ్యంలో, ఢిల్లీ, హర్యానా, బీహార్, పశ్చిమ బెంగాల్లలో తిరిగి ఎన్నికలు నిర్వహించాలని ఢిల్లీ మాజీ ముఖ్యమంత్రి, ఆమ్ ఆద్మీ పార్టీ నాయకుడు అరవింద్ కేజ్రీవాల్ డిమాండ్ చేశారు. అలాగే, ప్రధాన ఎన్నికల కమిషనర్ జ్ఞానేశ్వర్ కుమార్ను అరెస్టు చేయాలని కూడా ఆయన డిమాండ్ చేశారు.
జమ్మూ కాశ్మీర్ ముఖ్యమంత్రి ఒమర్ అబ్దుల్లా మాట్లాడుతూ, “దిద్దుబాటు చర్యలు తీసుకోవాల్సిన అవసరం ఉంది” అని పేర్కొంటూ “ఎన్నికలపై ప్రజల విశ్వాసం కోల్పోతే, ప్రజాస్వామ్యంలో ఇంకేముంటుంది?” అని ప్రశ్నించారు. “ముందుగా, నేను ‘ది ఇండియన్ ఎక్స్ప్రెస్’ను అభినందిస్తాను. ఇది చాలా మంచి పరిశోధనాత్మక జర్నలిజం కథనం. ఒక కథ మూలాలను తెలుసుకోవడానికి పట్టుదలతో ప్రయత్నిస్తే, అది అసాధ్యం కాదని ఇది చూపిస్తుంది” అని పేర్కొన్నారు.
టీఎంసీ రాజ్యసభ నాయకుడు డెరెక్ ఓ’బ్రియన్ ‘ఎక్స్’ ఛానెల్లో మాట్లాడుతూ, “ఐదు నెలల క్రితం, 60 మందికి పైగా రాజ్యసభ ఎంపీలు (50 మంది అవసరం) సీఈసీ జ్ఞానేష్ కుమార్ను తొలగించాలని కోరుతూ రాజ్యసభ ఛైర్మన్కు లేఖ రాశారు. సీఈసీ తీసుకున్న అనేక చర్యలను ఇద్దరు ఎన్నికల కమిషనర్లు వ్యతిరేకించారన్న పెద్ద వార్త ఈరోజు బయటకు వచ్చిన తర్వాత, రాజ్యసభ తీర్మానాన్ని ఈరోజు తీసుకురావాల్సిన సమయం ఆసన్నమైంది. ప్రజాస్వామ్యాన్ని కాపాడటానికి సీఈసీని అభిశంసించండి” అని స్పష్టం చేశారు.
జ్ఞానేష్ కుమార్కు జైలు శిక్ష విధించాలని శివసేన (యూబీటీ) అధినేత ఉద్ధవ్ థాకరే డిమాండ్ చేశారు. “జ్ఞానేష్ కుమార్ బండారం బయటపెట్టినందుకు ఎన్నికల కమిషనర్లు (ఈసీలు) సుఖ్బీర్ సింగ్ సంధు, వివేక్ జోషిలకు నేను ధన్యవాదాలు తెలుపుతున్నాను. ఈ విషయాన్ని కోర్టు సుమోటోగా స్వీకరించాలి,” అని ఆయన కోరారు. మహారాష్ట్ర, పశ్చిమ బెంగాల్, తమిళనాడు రాష్ట్రాల్లో జరిగిన గత ఎన్నికలను రద్దు చేసి, బ్యాలెట్ పత్రాలతో ఆ రాష్ట్రాల్లో తిరిగి ఎన్నికలు నిర్వహించాలని కూడా ఆయన డిమాండ్ చేశారు.
ఈ వెల్లడి అయిన విషయాలు కేవలం ఎన్నికల ప్రక్రియ గురించే కాకుండా, అంతకంటే ముఖ్యంగా భారత ఎన్నికల సంఘం (ఈసీఐ) సమగ్రతపైనే తీవ్రమైన ప్రశ్నలను లేవనెత్తుతున్నాయని సిపిఎం పేర్కొంది. “ఎస్ఐఆర్ ప్రక్రియ ప్రారంభమైనప్పటి నుండి సీపీఎం, ఇతర ప్రతిపక్ష పార్టీలు, పౌర సమాజ సంస్థలు లేవనెత్తుతున్న అనుమానాలను, ఆందోళనలను ఈ వెల్లడి అయిన విషయాలు మరింత బలపరిచాయి,” అని తెలిపింది. ఈ నివేదిక ఓటర్లలో తీవ్రమైన సందేహాలను రేకెత్తించిందని, ఈ విషయంపై సుప్రీంకోర్టు సుమోటో విచారణ ప్రారంభించాలని బీఆర్ఎస్ వర్కింగ్ ప్రెసిడెంట్ కేటీ రామారావు (కేటీఆర్) సూచించారు.
About The Author
More Stories
8 మంది ఎమ్మెల్యేల చేరికతో మేఘాలయలో రెండో అతి పార్టీగా బిజెపి
ఒడిశా..పునరుడేశ్వరి, తమిళనాడు..రాంమాధవ్, తెలంగాణ.. బన్సల్
దిగొచ్చిన సర్కార్.. జూరాలకు కుడి, ఎడమ కాలువకు నీటి విడుదల