గణపతి విగ్రహం చుట్టూ నేతల ఫ్లెక్సీలు, జై జగన్‌ నినాదాలే

అంతేకాదు, అధికార పార్టీ వారి గణపతి ఊరేగింపులకు అన్ని అనుమతులూ లభిస్తాయి. కానీ… ప్రత్యర్థి వర్గీయుల విఘ్నేశుడికి మాత్రం అన్నీ విఘ్నాలే! నేరుగా వైసీపీ వినాయకుడు, టీడీపీ వినాయకుడిగా దేవుడిని విభజించేశారు.  వైసీపీ వినాయకుడికి  పూర్తి పార్టీ రంగు పులిమేశారు. గత ఏడాది కొద్దిగా మొదలైన ఈ పెడధోరణి  ఈసారి మరింత శ్రుతి మించింది.

విగ్రహానికి అటూఇటూ ముఖ్యమంత్రి జగన్‌, స్థానిక ఎమ్మెల్యే కటౌట్లు,  వైసీపీ రంగు జెండాలు, ఆ పార్టీకి చెందిన పాటలతో ఆధ్యాత్మిక వేడుకలో రాజకీయ రచ్చ చేయడం మొదలైంది. ఇక… నిమజ్జన ఊరేగింపుల్లో వినాయకుడి భజనలు, కీర్తనలు కాకుండా ‘జై జగన్‌… జైజై జగన్‌’ నినాదాలే వినిపించాయి.

ప్రత్తిపాడు మండలం తుమ్మలపాలెంలో వైసీపీ వినాయకుడి విగ్రహ ఊరేగింపులో పార్టీ కక్షలు బహిర్గతమయ్యాయి. కోప్పరులో వైసీపీ  ఏర్పాటు చేసిన వినాయక విగ్రహ ఊరేగింపు సందర్భంగా భారీ విధ్వంసమే సృష్టించారు. వారిని అడ్డుకోవాల్సిన పోలీసులు  ‘ఇంట్లోకి వెళ్లి ప్రాణాలు కాపాడుకోండి’ అంటూ టీడీపీ నేతలకు ఉచిత సలహా ఇచ్చారు.