ఆఫ్ఘనిస్తాన్ వ్యవహారాలలో ఇస్లామాబాద్ జోక్యంకు నిరసనగా పాకిస్తాన్ వ్యతిరేక నినాదాలు చేస్తూ, తాలిబాన్లకు వ్యతిరేకంగా నిరసనగా వందలాది మంది ఆఫ్ఘన్ పురుషులు, మహిళలు మంగళవారం కాబూల్ వీధుల్లోకి వచ్చారు. ఆఫ్ఘనిస్తాన్‌లో ఇస్లామాబాద్ జోక్యం చేసుకోవడం, పంజ్‌షీర్‌లో తాలిబాన్ల దాడికి మద్దతునివ్వడాన్ని ఖండిస్తూ, కాబూల్‌లోని పాకిస్తాన్ రాయబార కార్యాలయం వెలుపల నిరసన చేపట్టారు.
తాలిబాన్ వ్యతిరేక నిరసనలు వీడియోలు సోషల్ మీడియాలో వైరల్ అవుతున్నాయి. వాటిల్లో నిరసనకారులు “ప్రతిఘటనకు జీవించండి”, “పాకిస్తాన్‌కు మరణం” వంటి నినాదాలు వినిపిస్తున్నాయి. ర్యాలీని చెదరగొట్టడానికి తాలిబాన్ ముష్కరులు గాలిలో కాల్పులు జరిపారని, నిరసనను కవర్ చేస్తున్న పలువురు ఆఫ్ఘన్ జర్నలిస్టులను అరెస్టు చేశారని ప్రత్యక్ష సాక్షులు తెలిపారు.
నిరసనను కవర్ చేస్తున్న ఆఫ్ఘనిస్తాన్ కు చెందిన టోలో న్యూస్ కెమెరామెన్ వహీద్ అహ్మదిని కూడా తాలిబన్లు అదుపులోకి తీసుకున్నారు. “వారు నా ముక్కును నేలపై రుద్దారు. నిరసనను కవర్ చేసినందుకు క్షమాపణలు అడిగారు” అని తరువాత విడుదలైన ఆఫ్ఘన్ జర్నలిస్ట్ అసోసియేటెడ్ ప్రెస్‌తో చెప్పారు. “ఆఫ్ఘనిస్తాన్‌లో జర్నలిజం కష్టతరం అవుతోంది,” అంటూ ఆందోళన వ్యక్తం చేశారు.
టోలో మాతృ సంస్థ మొబి గ్రూప్ సీఈఓ సాద్ మొహ్సేనీ ట్విట్టర్‌లో తాలిబాన్ తొలుత ఇచ్చిన హామీలకు విరుద్ధమైన చర్యలకు దిగుతున్నదని విచారం వ్యక్తం చేశారు. “తాలిబాన్లు తాము భావ ప్రకటనా స్వేచ్ఛను, ఈవెంట్‌లను కవర్ చేసే మీడియా హక్కును గౌరవిస్తామని హామీ ఇచ్చారు. కానీ ఇప్పుడు ఈ విధంగా వ్యవహరిస్తున్నారు” అని ఆయన ట్వీట్ చేశారు.
పాకిస్తాన్ ఇంటర్-సర్వీసెస్ ఇంటెలిజెన్స్ (ఐఎస్ఐ) ఆఫ్ఘనిస్తాన్‌లో “సొంత వ్యక్తి” నేతృత్వంలో ఒక తోలుబొమ్మ ప్రభుత్వం ఏర్పాటు చేయడం కోసం చూస్తున్నట్లు అనేక మీడియా నివేదికలు సూచిస్తున్నాయి. అందుకనే ప్రభుత్వ ఏర్పాటులో జాప్యానికి దారితీస్తుంది. తాలిబాన్ అధికార ప్రతినిధి జబివుల్లా ముజాహిద్ ఈ వారంలో కొత్త ప్రభుత్వం ఏర్పడుతుందని గత శనివారం ప్రకటించారు.
మంగళవారం వందలాది మంది నిరసనకారులు వీధుల్లోకి వచ్చి తాలిబాన్ పాలనను ఖండించారు. మహిళల హక్కుల కోసం డిమాండ్ చేశారు. నిరసనకారులు పాకిస్తాన్ వ్యతిరేక నినాదాలు చేశారు.
బిబిసికి పంపిన వీడియోలో తాలిబాన్ యోధులు తమ తుపాకులను గాలిలోకి కాల్చడం చూపించారు. దాదాపు 20 నిమిషాల పాటు కాల్పుల నుండి తప్పించుకోవడానికి డజన్ల కొద్దీ మహిళలకు సమీపంలోని బ్యాంకులోని గార్డులు దాని బేస్‌మెంట్ కార్ పార్క్‌ను తెరిచారని ఆందోళనకారులలో ఒకరు బిబిసికి చెప్పారు.
కాగా, ఖతార్ పాలక ఎమిర్, అమెరికా రక్షణ శాఖ సంయుక్త కార్యదర్శులు ఆఫ్ఘనిస్తాన్ అభివృద్ధి, అక్కడ భద్రతను పెంచే ప్రయత్నాల గురించి చర్చించినట్లు ఎమిర్ కోర్టు తెలిపింది. తాలిబాన్ స్వాధీనం తర్వాత ఆఫ్ఘనిస్తాన్‌లో మిగిలిపోయిన అమెరికన్లు, ప్రమాదంలో ఉన్న ఆఫ్ఘన్‌లను తరలించడానికి, కొత్త ఇస్లామిస్ట్ పాలకులకు ఎలా ప్రతిస్పందించాలనే దానిపై మిత్రదేశాల మధ్య ఏకాభిప్రాయం కోసం వాషింగ్టన్ కు మద్దతు కోరేందుకు ఈ పర్యటన జరిపారు.
More Stories
ఇందిరా ఆస్తి పోవద్దనే వారసత్వపు పన్ను రద్దు
భారత్ తో వాణిజ్య సంబంధాలకై పాక్ ప్రధానిపై వత్తిడి
దేశం సుభిక్షంగా ఉండాలంటే మోదీ రావాలి