కేరళలో రామాయణంను ఆశ్రయిస్తున్న వామపక్షాలు 

ఇటీవల జరిగిన అసెంబ్లీ ఎన్నికలలో దేవుడిపై నమ్మకం లేని పార్టీలు సహితం హిందూ దేవాలయాలు, హిందూ దేవతలను ఆశ్రయించడం చూసాము. తమిళనాడులో డీఎంకే ప్రత్యేకంగా `హిందూ దేవాలయాల పరిరక్షణ’ కోసం అంటూ ఒక పత్రం విడుదల చేసింది. ఆ పార్టీ అధినేత ఎంకే స్టాలిన్ తో పాటు, పలువురు నేతలు దేవాలయాల చుట్టూ ప్రదక్షణలు చేశారు.

ఇక పశ్చిమ బెంగాల్ లో ముఖ్యమంత్రి మమతా బెనర్జీ  ప్రత్యేకంగా దుర్గా పూజలు జరిపి, తాను బ్రాహ్మణా కులస్థురాలిని అంటూ చాటుకొని హిందువులను ఆకట్టుకొనే ప్రయత్నం చేశారు. గత ఎన్నికలలో కాంగ్రెస్ నేత రాహుల్ గాంధీ దేవాలయాల సందర్శనతో ఇటువంటి ప్రయత్నాలు చేసినా ప్రజలు నమ్మక పోవడం వేరే విషయం.

కేరళలో మొదటి ముస్లిం జిల్లాను ఏర్పాటు చేసి తమ `లౌకిసవాదాన్ని’ 50వ దశకంలోనే చాటుకున్న సిపిఐ ఇప్పుడు అదే మల్లాపురం జిల్లాలో హిందువులను ఆకర్షించడం కోసం రామాయణంపై ఆన్ లైన్ లో ప్రసంగాలు నిర్వహించింది. సిపిఐ జిల్లా కమిటీ పేస్ బుక్ పేజీలో “రామాయణం – భారత వారసత్వం” పేరుతో వారం రోజుల పాటు సాగిన ఈ ప్రసంగాలు జులై 25న ప్రారంభం అయ్యాయి.

రాష్ట్ర స్థాయి సిపిఐ నాయకులు ఈ ప్రసంగాలు చేశారు. రామాయణం విశ్వజనీన సందేశం ఇస్తున్నట్లు ఈ సందర్భంగా పేర్కొన్న సిపిఐ సీనియర్ నేతలు దాని సారాంశం కమ్యూనిజం మూల సూత్రాలే అన్నట్లు చిత్రీకరించే ప్రయత్నం చేశారు.

సరిగ్గా మూడేళ్ళ క్రితం, కేరళలో సిపిఎం ఆధ్వర్యంలో ఏర్పడిన కేరళ సంస్కృత సంఘం రామాయణంలోని వివిధ కధనాల గురించి అవగాహన కల్పించడానికి ఒక మిషన్‌ను ప్రారంభించింది. జులై 15, 2018లో ప్రారంభించి నెల రోజుల పాటు రాష్ట్రంలోని 14 జిల్లా ప్రధాన కార్యాలయాల్లో రామాయణంపై ఆలోచనలు పేరుతో సెమినార్లు నిర్వహించారు.