మాస్క్ ధరించమన్న మహిళా ఉద్యోగిని చితక్కొట్టారు 

దివ్యాంగ ఉద్యోగినిపై దాడి ఘటనపై టూరిజం శాఖ మంత్రి అవంతి శ్రీనివాస్‌ సీరియస్ అయ్యారు. డిప్యూటీ మేనేజర్‌ భాస్కర్‌ను సస్పెండ్‌ చేసి క్రిమినల్‌ చర్యలు తీసుకోవాలని అధికారులకు మంత్రి ఆదేశించారు. మంత్రి ఆదేశాల మేరకు దివ్యాంగ ఉద్యోగినిపై హత్యాయత్నానికి పాల్పడ్డ భాస్కర్‌ని సస్పెండ్ చేస్తూ ఏపీ టూరిజం శాఖ ఎండీ ప్రవీణ్ కుమార్ ఆదేశాలు జారీ చేశారు. మంత్రి ఆదేశాల మేరకు పూర్తిస్థాయి విచారణకు ఆదేశించినట్లు పేర్కొన్నారు. అనుమతి లేనిదే జిల్లా కేంద్రం వదిలివెళ్లొద్దని భాస్కర్‌కి ఆదేశించారు.

అలాగే మహిళా ఉద్యోగిపై దాడి చేయడాన్ని ఏపీ మహిళా కమిషన్‌ చైర్‌పర్సన్‌ వాసిరెడ్డి పద్మ కూడా తీవ్రంగా ఖండించారు. నెల్లూరు వెళ్లి బాధితురాలు ఉషారాణిని పరామర్శించారు. దివ్యాంగురాలైన మహిళపై దాడి చేయడం అమానుషమన్నారు. సభ్య సమాజం తలదించుకునేలా భాస్కర్‌ ప్రవర్తించారని మండిపడ్డారు.