తెలుగు రాష్ట్రాల్లో భానుడి భగభగలకు వాతావరణం నిప్పుల కొలిమిలా మారింది. గత కొన్ని రోజులుగా రికార్డు స్థాయిలో నమోదవుతున్న ఉష్ణోగ్రతలు, తీవ్రమైన వడగాల్పుల కారణంగా ప్రజలు అల్లాడిపోతున్నారు. ఎండల తీవ్రత ఎంతలా ఉందంటే శుక్రవారం ఒక్కరోజే రెండు రాష్ట్రాలలో వడదెబ్బ తగిలి వేర్వేరు జిల్లాల్లో మొత్తం 30 మంది ప్రాణాలు కోల్పోవడం అత్యంత విషాదాన్ని నింపింది.
ఆంధ్రప్రదేశ్లో ఎండల తీవ్రత మరీ ఘోరంగా ఉంది, అక్కడ నిన్న ఒక్కరోజే 21 మంది మరణించారు. అందులోనూ ఒక్క విజయవాడ నగరంలోనే 10 మంది ప్రాణాలు కోల్పోవడం పరిస్థితి జటిలతకు అద్దం పడుతోంది. వేర్వేరు ప్రాంతాల్లో మరో 50 మంది వరకు అస్వస్థతకు గురయ్యారు. అటు తెలంగాణలోనూ ఎండల వేడి తగ్గడం లేదు, నిన్న వివిధ జిల్లాల్లో వడదెబ్బ కారణంగా 9 మంది మృతి చెందారు.
రాష్ట్రంలో ఎండల తీవ్రత దృష్ట్యా అధికార యంత్రాంగం నిరంతరం అప్రమత్తంగా ఉండాలని, ప్రజలను రక్షించేందుకు తక్షణ చర్యలు చేపట్టాలని అధికారులను ముఖ్యమంత్రి చంద్రబాబు ఆదేశించారు. రాష్ట్రంలో ఉష్ణోగ్రతలు అత్యధికంగా నమోదవుతున్న ప్రాంతాలను గుర్తించి, ఆయా ప్రాంతాల్లోని ప్రజలకు నిరంతరం హెచ్చరికలు పంపాలని సూచించారు. ఎండల తీవ్రత మరీ ఎక్కువగా ఉన్న ప్రాంతాల్లో పరిస్థితులను బట్టి స్థానికంగా సెలవులు ప్రకటించాలని దిశానిర్దేశం చేశారు.
సాధారణంగా వృద్ధులు, చిన్నపిల్లలపై ఎండల ప్రభావం ఎక్కువగా ఉంటుందని భావిస్తారు, కానీ ఈసారి మృతుల్లో యువకులు కూడా పెద్ద సంఖ్యలో ఉండటం పట్ల వైద్య నిపుణులు తీవ్ర ఆందోళన వ్యక్తం చేస్తున్నారు. వాతావరణ శాఖ నివేదికల ప్రకారం తెలుగు రాష్ట్రాల్లో మరికొద్ది రోజుల పాటు ఇదే విధమైన తీవ్రమైన ఎండలు, ఉష్ణోగ్రతలు కొనసాగే అవకాశం ఉంది.
ఈ నేపథ్యంలో ప్రజలు అత్యంత అప్రమత్తంగా ఉండాలని, అవసరమైతే తప్ప ఇళ్ల నుంచి బయటకు రాకూడదని విపత్తు నిర్వహణ శాఖ హెచ్చరించింది. ముఖ్యంగా ఉదయం 11 గంటల నుండి సాయంత్రం 4 గంటల వరకు ఎండ తీవ్రత ఎక్కువగా ఉంటుంది కాబట్టి ఆ సమయంలో ప్రయాణాలను వాయిదా వేసుకోవడం మంచిది.
బయటకు వెళ్లాల్సి వస్తే ఖచ్చితంగా గొడుగు, టోపీ ధరించాలని, అలాగే డీహైడ్రేషన్ బారిన పడకుండా ఉండటానికి నిరంతరం మంచినీరు, ఓఆర్ఎస్ ద్రావణం, మజ్జిగ, కొబ్బరినీళ్లు వంటి ద్రవాహారాన్ని ఎక్కువగా తీసుకోవాలని నిపుణులు సూచిస్తున్నారు. శరీరంలో అలసట, మైకం, లేదా వాంతులు వచ్చేలా ఉంటే ఏమాత్రం నిర్లక్ష్యం చేయకుండా తక్షణమే సమీపంలోని ప్రాథమిక ఆరోగ్య కేంద్రానికి వెళ్లి వైద్య సహాయం పొందడం ద్వారా ప్రాణాపాయం నుండి తప్పించుకోవచ్చని వైద్యులు హెచ్చరిస్తున్నారు.
More Stories
జనసేన ఫిర్యాదుతో ప్రొఫెసర్ నాగేశ్వర్పై కేసు
ఎస్ఐఆర్ లో నిజమైన ఓటరుకు అన్యాయం జరగదు
ఐదో తరం విమానాలు గగనంలో ఎగరబోతున్నాయి