రాజధాని అమరావతికి కేంద్రం గ్రాంటుగా రూ 15,000 కోట్లు

ఆ మొత్తంలో సుమారు రూ.13,440 కోట్లు ప్రపంచ బ్యాంకు, ఏడీబీల నుంచి కేంద్ర ఆర్థికశాఖ రుణంగా తీసుకుని, సీఆర్​డీఏకు ఇవ్వనుంది. ఆ రెండు బ్యాంకులూ చెరో 80 కోట్ల డాలర్ల చొప్పున రుణం ఇస్తున్నాయి. రూ.15,000ల కోట్లలో బ్యాంకులు ఇచ్చేది పోగా మిగతా మొత్తాన్ని కేంద్రం సమకూరుస్తుంది. బ్యాంకులకు రుణాన్ని కేంద్ర ప్రభుత్వమే తిరిగి చెల్లిస్తుంది.

అమరావతి కేపిటల్ సిటీ డెవలప్​మెంట్​ ప్రొగ్రాం పేరుతో ప్రపంచ బ్యాంకు, ఏడీబీ ఆ రుణం ఇస్తున్నాయి. ఇందుకు సంబంధించిన వివరాలతో కూడిన పత్రాల్ని ప్రపంచ బ్యాంకు వెబ్‌సైట్‌లో ఉంచింది.  కేంద్ర ఆర్థికశాఖను రుణ గ్రహీతగా, సీఆర్​డీఏను ప్రాజెక్టు అమలు ఏజెన్సీగా ప్రపంచ బ్యాంకు అందులో పేర్కొంది. ‘ప్రొగ్రామ్ ఫర్ రిజల్ట్స్ ఫైనాన్సింగ్ ” విధానంలో రుణం సమకూరుస్తున్నట్లు తెలిపింది.

ఈ లెక్కన రూ.15,000ల కోట్లలో రాష్ట్ర ప్రభుత్వం ఒక్క రూపాయి కూడా తిరిగి చెల్లించాల్సిన అవసరం లేదు. దీన్ని బట్టి రూ.15,000ల కోట్లు కేంద్ర ప్రభుత్వం నుంచి ఏపీకి గ్రాంట్‌గానే వస్తోందని స్పష్టమవుతోంది.