పోలవరం పూర్తికి నాలుగేళ్లు పట్టే అవకాశం

నదుల అనుసంధానంతో ప్రతి ఎకరాకు నీళ్లు ఇవ్వాలని భావించామని తెలిపారు. పోలవరం ప్రాజెక్టు​ పేరుతో రూ.వేల కోట్ల ప్రజాధనం వృథా జరిగిందని ఆవేదన వ్యక్తం చేశారు. అప్పుడే ప్రాజెక్టు చేపడితే తక్కువ ఖర్చుతో పూర్తయ్యేదని చెబుతూ  ప్రస్తుతం ప్రాజెక్టు వ్యయం పెరిగిందని చెప్పారు. నష్టం చేసిన వ్యక్తులపై చర్యలు తీసుకోవాల్సిన అవసరం ఉందని చంద్రబాబు స్పష్టం చేశారు.

అంతకు ముందు పోలవరం ప్రాజెక్టు వద్దకు చేరుకున్న సీఎం చంద్రబాబు అధికారులతో కలిసి ప్రాజెక్టు ప్రాంతంలో కలియతిరిగారు.  స్పిల్‌వే, కాఫర్‌ డ్యామ్‌, డయాఫ్రమ్‌ వాల్‌ పనుల పురోగతిపై జలవనరుల శాఖ అధికారులను అడిగి తెలుసుకున్నారు. ఆ తర్వాత వారితో కలిసి బస్సులో ప్రాజెక్టు పరిసరాలను పరిశీలించారు. 

అక్కడ ఏర్పాటు చేసిన ఫొటో ప్రదర్శనను తిలకించారు. గతంలో ఎడమగట్టు వద్ద కుంగిన గైడ్‌బండ్‌ ప్రాంతాన్ని పరిశీలించి అధికారులతో మాట్లాడారు. 22, 23 గేట్ల నుంచి ప్రాజెక్టు పరిసరాలను చూశారు. పరిశీలన అనంతరం అధికారులతో సీఎం సమీక్ష నిర్వహించారు. 2014-2019 మధ్య టీడీపీ అధికారంలో ఉన్నప్పుడు చంద్రబాబు ప్రతి సోమవారాన్ని పోలవారంగా పిలిచేవారు. అలాగే ప్రాజెక్టును సందర్శించి పనుల పురోగతిపై సమీక్ష చేసేవారు. మళ్లీ ప్రభుత్వం అధికారంలోకి రావడంతో మళ్లీ సోమవారాన్ని పోలవారంగా మార్చారు.