బెంగళూరులో సగం మంది ఓటర్లు ఇంటికే పరిమితం

కర్ణాటకలోని 14 నియోజకవర్గాల్లో శుక్రావారం 69.23 శాతం పోలింగ్ నమోదైనట్లు ఎన్నికల సంఘం ప్రకటించింది. అయితే బెంగళూరులోని మూడు కీలక నియోజకవర్గాలైన  బెంగుళూరు సెంట్రల్, బెంగళూరు నార్త్, బెంగళూరు సౌత్​లలో ఓటింగ్ శాతం మొత్తం రాష్ట్ర సగటు కంటే తక్కువగా నమోదైంది. కర్ణాటకలోని 14 నియోజకవర్గాల్లో 69.23 శాతం పోలింగ్ నమోదైనట్లు ఎన్నికల సంఘం ప్రకటించినప్పటికీ, ఈ మూడు పట్టణ ప్రాంతాల్లో తక్కువ శాతం ఓటర్లు తమ ఓటు హక్కును వినియోగించుకున్నారు.

ఈ లోక్​సభ ఎన్నికల్లో బెంగళూరు సెంట్రల్​లో 52.81 శాతం, బెంగళూరు నార్త్​లో 54.42 శాతం, బెంగళూరు సౌత్​లో 53.15 శాతం పోలింగ్ నమోదైంది. 2019 లోక్​సభ ఎన్నికల్లో ఇదే బెంగళూరు సెంట్రల్లో 54.32 శాతం, బెంగళూరు నార్త్​లో 54.76 శాతం, బెంగళూరు సౌత్లో 53.70 శాతం పోలింగ్ నమోదైంది. అంటే గతంతో పోల్చుకుంటే ఈసారి ఇంకా తక్కువ  పోలింగ్ శాతం నమోదైనట్టు వెల్లడవుతుంది. పైగా.. ప్రతిసారి ఇదే పరిస్థితులు కనిపిస్తున్నట్టు అర్థం చేసుకోవచ్చు.

ఓటు హక్కు విషయంపై ఎంత అవగాహన కల్పించినా, ఎంత తీవ్రంగా ప్రచారాలు చేసినా, ఓటర్ల ఉదాసీనత కొనసాగడంపై ఎన్నికల సంఘం అధికారులు అసంతృప్తి వ్యక్తం చేశారు. అయితే  తీవ్రమైన ఎండలు తక్కువ పోలింగ్ కు ఓ కారణంగా భావిస్తున్నారు. అదే బెంగళూరు రూరల్​లో 67.29 శాతం పోలింగ్ నమోదైంది. మాండ్యలో 81.48 శాతం, కోలార్ లో 78.07 శాతం పోలింగ్ నమోదైంది.