పెన్షన్ల పంపిణీలో కొనసాగుతున్న రగడ

బుధవారం ఉదయం బ్యాంకుల నుంచి నగదు తీసుకువచ్చి వాటిని లబ్దిదారులకు అందించే కార్యక్రమం సకాలంలో ప్రారంభం కాలేదు. ఉదయాన్నే పెన్షన్ల కోసం సచివాలయాల తలుపులు తెరవక ముందే లబ్దిదారులు చేరుకున్నారు. బ్యాంకుల నగదు రావాల్సి ఉందని చెప్పడంతో అక్కడే ఎదురు చూస్తున్నారు.  మరోవైపు ఇంటింటి పంపిణీ నిలిచిపోవడానికి టీడీపీ నేతల ఫిర్యాదులే కారణమని ఆరోపిస్తూ రాష్ట్ర వ్యాప్తంగా పలు ప్రాంతాల్లో వృద్ధులు, వికలాంగుల్ని మంచాలపై సచివాలయాలకు తరలించే ప్రయత్నం వైసిపి శ్రేణులు చేస్తున్నారు. కొన్ని చోట్ల నల్లజెండాలతో ర్యాలీగా సచివాలయాలకు వెళ్లారు.

రాష్ట్రవ్యాప్తంగా మొత్తం 65,69,904 మంది లబ్దిదారులకు ఫించన్లు పంపిణీ చేసేందుకు రూ.1,951.69 కోట్లను రాష్ట్ర ప్రభుత్వం విడుదల చేసింది. ఈ మొత్తాన్ని గ్రామ, వార్డు సచివాలయాలవారీగా బ్యాంకులలో మంగళవారం రాత్రి జమ చేశారు. రాష్ట్రంలోని 15వేలకు పైగా సచివాలయాల ఖాతాలకు ఈ నగదును జమ చేశారు. సచివాలయ అడ్మిన్ సెక్రటరీలు నగదును విత్‌ డ్రా చేసి అయా సచివాలయ పరిధిలో పంపిణీ చేయాల్సి ఉంటుంది.