ఆరు గ్యారెంటీలతో గారడీలు చేసి ప్లేటు ఫిరాయిస్తున్న కాంగ్రెస్

గత సీఎం కేసీఆర్ గారి కుటుంబ, నియంతృత్వ పోకడలు, ప్రజా వ్యతిరేక చర్యల వల్ల ప్రజలు మార్పు కోరుకున్నారని, ఆ మార్పులో బీఆర్ఎస్ ఓడిపోయి, కాంగ్రెస్ పార్టీకి లాభం జరిగిందని తెలిపారు.  ఓటమి చెందిన బీఆర్ఎస్ పార్టీ నాయకులు ప్రజా తీర్పును శిరసావహించకుండా, అసహనంతో ఓడిపోయామనే అక్కసుతో వ్యవహరిస్తున్నారని లక్ష్మణ్ విమర్శించారు.

ముఖ్యమంత్రి కాలేదనే భావనతో మాజీ మంత్రులు కేటీఆర్, హరీష్ రావు భారతీయ పార్టీ పైన విమర్శలు చేస్తున్నారని ధ్వజమెత్తారు.  ముఖ్యమంత్రి రేవంత్ రెడ్డి సహితం బీజేపీ నాయకుల పట్ల స్థాయి మరచి  మాట్లాటడం సిగ్గుచేటని దుయ్యబట్టారు.  సుధీర్ఘ కాలం అధికారానికి దూరంగా ఉన్న కాంగ్రెస్ నాయకులు మంత్రులు కావడంతో భారతీయ జనతా పార్టీ పైన అనేక మాటలు మాట్లాడుతున్నారని అంటూ ఆగ్రహం వ్యక్తం చేశారు.

వచ్చే పార్లమెంటు ఎన్నికల్లో నరేంద్ర మోదీ గారు మూడోసారి ప్రధానమంత్రి అవుతారనే అక్కసుతో కాంగ్రెస్ నాయకులు బీజేపీపై విమర్శలు చేస్తున్నారని తెలిపారు. బీఆర్ఎస్ పార్టీకి చెందిన సిట్టింగ్ ఎంపీలు పోటీ చేయాడానికి సిద్ధంగా లేరని చెబుతూ అనేక మంది ఆ పార్టీ ఎంపీలు బిజెపితో టచ్ లో ఉన్నారని వెల్లడించారు. పార్లమెంటు ఎన్నికల్లో కాంగ్రెస్ పార్టీ నుంచి పోటీ చేయడానికి అభ్యర్థులే లేరని వెల్లడించారు.