‘‘ఈడీ నుంచి వచ్చిన సమన్లన్నింటికీ మేం సమాధానం ఇచ్చాం. చివరగా ఫిబ్రవరి 17 న సీఎం అరవింద్ కేజ్రీవాల్ వర్చువల్ గా కోర్టులోనే ఉన్నారు. తదుపరి విచారణను కోర్టు మార్చి 16కు వాయిదా వేసింది. మేము చట్టాన్ని పాటించే వ్యక్తులం. కోర్టు ఏం చెబితే అది పాటిస్తాం. ఈ కేసులో కోర్టు ఇచ్చే తీర్పు కోసం ఈడీ వేచిచూడాల్సింది. కోర్టు తీర్పు రాకముందే, సమన్లు పంపడం కోర్టు ధిక్కారమే’’ అని ఆప్ అధికార ప్రతినిధి ప్రియాంక కక్కర్ ధ్వజమెత్తారు. 

వచ్చే లోక్ సభ ఎన్నికల్లో కేజ్రీవాల్ ప్రచారం చేయకుండా ఉండేందుకు ఆయనను అరెస్టు చేయాలని ఎన్ ఫోర్స్ మెంట్ డైరెక్టరేట్ యోచిస్తోందని ఆప్ ఆరోపిస్తోంది. తాము పంపిస్తున్న సమన్లను కేజ్రీవాల్ పట్టించుకోకపోవడంపై ఎన్ ఫోర్స్ మెంట్ డైరెక్టరేట్ ఢిల్లీ కోర్టును ఆశ్రయించింది. 

పీఎంఎల్ఏ సెక్షన్ 50కి అనుగుణంగా తమ ముందు కేజ్రీవాల్ హాజరు కానందుకు క్రిమినల్ ప్రొసీజర్ కోడ్ లోని సెక్షన్ 190 (1)(ఎ), 200, ఇండియన్ పీనల్ కోడ్ లోని సెక్షన్ 174, ప్రివెన్షన్ ఆఫ్ మనీ లాండరింగ్ యాక్ట్ (పీఎంఎల్ఏ) సెక్షన్ 63(4) కింద ఈడీ కేసు నమోదు చేసింది. దీనిపై ఫిబ్రవరి 17న రౌస్ అవెన్యూ కోర్టుకు కేజ్రీవాల్ వీడియో కాన్ఫరెన్స్ ద్వారా హాజరయ్యారు.