ఖతార్ లో భారత మాజీ నేవీ అధికారుల విడుదల  

భారతీయ పౌరులను విడుదల చేయాలనే ఖతార్ నిర్ణయాన్ని కేంద్ర ప్రభుత్వం స్వాగతించింది. వారు తిరిగి వచ్చేందుకు వీలు కల్పించినందుకు ఖతార్ అమీర్‌కు కృతజ్ఞతలు తెలిపింది. దౌత్యపరమైన నిర్ణయానికి భారత్ ప్రశంసలను వ్యక్తం చేస్తూ, నావికాదళపు అనుభవజ్ఞులైన అధికారులను విడుదల చేయాలనే నిర్ణయాన్ని స్వాగతిస్తూ కేంద్ర ప్రభుత్వం ఒక అధికారిక ప్రకటనను విడుదల చేసింది.

 “కతార్‌లో నిర్బంధించబడిన దహ్రా గ్లోబల్ కంపెనీలో పనిచేస్తున్న ఎనిమిది మంది భారతీయ పౌరులను విడుదల చేయడాన్ని భారత ప్రభుత్వం స్వాగతించింది. వారిలో ఎనిమిది మందిలో ఏడుగురు భారతదేశానికి తిరిగి వచ్చారు. వీరి విడుదల, స్వదేశానికి వెళ్లేందుకు వీలుగా ఖతార్ ప్రభుత్వ అమీర్ తీసుకున్న నిర్ణయాన్ని మేము అభినందిస్తున్నాము”  అని తెలిపింది.

ఖైదీలకు కాన్సులర్, చట్టపరమైన సహాయం అందించడానికి విదేశాంగ శాఖ తన నిబద్ధతను పునరుద్ఘాటించింది.  ఖతార్ అధికారులతో ఈ విషయంపై సంప్రదింపులు కొనసాగిస్తానని స్పష్టం చేసింది. చట్టపరమైన ప్రక్రియ కొనసాగుతున్నందున, ప్రమేయం ఉన్న భారతీయ పౌరుల ప్రయోజనాలను పరిరక్షించడంపై ప్రభుత్వం అప్రమత్తంగా ఉంటుందని తెలిపింది.