లోక్‌సభలోకి టియర్ గ్యాస్ వదిలిన ఆగంతకులు

కాగా, ఇటీవలే ఖలిస్థాన్‌ ఉగ్రవాది, నిషేధిత సిక్స్‌ ఫర్‌ జస్టిస్‌ (ఎస్ఎఫ్‌జే) సంస్థ అధినేత గురుపత్వంత్ సింగ్ పన్నూన్‌ బెదిరింపులకు పాల్పడ్డాడు. విషయం తెలిసిందే. ఈనెల 13లోగా పార్లమెంట్‌పై దాడి చేస్తామంటూ ఈనెల 6వ తారీఖున హెచ్చరించాడు. ఈ మేరకు ఓ వీడియో సందేశాన్ని కూడా సోషల్‌ మీడియా ద్వారా విడుదల చేశాడు. 

‘ఢిల్లీ బనేగా ఖలిస్థాన్‌’ (ఢిల్లీ ఖలిస్థాన్‌గా మారబోతోంది) అనే శీర్షికతో వీడియో రిలీజ్‌ చేశాడు. ఈనెల 13వ తేదీ లేదా అంతకంటే ముందే భారత పార్లమెంట్‌పై దాడి చేస్తామని బెదిరించాడు. 2001 పార్లమెంట్‌ దాడి దోషి అఫ్జల్‌ గురు పోస్టర్‌ను కూడా అందులో ప్రదర్శించాడు. ఈ వీడియోలో తనని చంపేందుకు భారత ఏజెన్సీలు చేసిన కుట్ర విఫలమైందని పేర్కొన్నాడు.

పన్నూన్‌ హెచ్చరికల నేపథ్యంలో తాజా పరిణామం చోటు చేసుకోవడం ఉగ్రకుట్రలో భాగమని అధికారులు భావిస్తున్నారు. అనూహ్య పరిణామంతో అధికారులు అప్రమత్తమయ్యారు. పార్లమెంట్‌ ఆవరణలో విస్తృతంగా తనిఖీలు చేస్తున్నారు. ఇంకా ఎవరైనా ఆగంతకులు పార్లమెంట్‌ ఆవరణలో నక్కి ఉన్నారామో అన్న అనుమానంతో అక్కడ క్షుణ్ణంగా పరిశీలిస్తున్నారు.

2001 డిసెంబరు 13న లష్కరే తొయిబా, జైషే మహ్మద్‌ ఉగ్ర సంస్థలకు చెందిన ముష్కరులు పార్లమెంట్‌ ప్రాంగణంలోకి చొచ్చుకొచ్చి కాల్పులకు తెగబడ్డారు. యావత్ దేశం ఈ ఘటనతో ఉలిక్కిపడింది. ఈ దాడిలో ఆరుగురు ఢిల్లీ పోలీసులు కాగా, ఇద్దరు పార్లమెంట్ సెక్యూరిటీ సిబ్బంది, ఒక తోటమాలి ప్రాణాలు కోల్పోయారు. తక్షణమే స్పందించిన భద్రతా సిబ్బంది ఎదురుకాల్పులు జరిపి ముష్కరులను హతమార్చారు.

తాజా ఘటనపై శివసేన (ఉద్ధవ్ వర్గం) అరవింద్ సావంత్ మాట్లాడుతూ ‘ఎవరికీ గాయాలు కాలేదు. వారు కిందకు దూకినప్పుడు వెనుక బెంచీలు ఖాళీగా ఉండడంతో పట్టుకున్నారు…ఇద్దరు మంత్రులు సభలో ఉన్నారు’ అని తెలిపారు. స‌భ జ‌రుగుతుండ‌గా అనూహ్యంగా 20 ఏండ్ల వ‌య‌సున్న ఇద్ద‌రు వ్య‌క్తులు విజిట‌ర్స్ గ్యాల‌రీ నుంచి స‌భ‌లోకి దూకి ప‌సుపు రంగు గ్యాస్‌ను వ‌దిలార‌ని కాంగ్రెస్ ఎంపీ కార్తీ చిదంబరం చెప్పారు.వారు కొన్ని నినాదాలు చేశార‌ని, వారు వ‌దిలిన గ్యాస్ విష వాయువు కావ‌చ్చ‌ని, ఇది తీవ్ర భ‌ద్ర‌తా వైఫ‌ల్య‌మ‌ని కార్తీ చిదంబ‌రం పేర్కొన్నారు. 2001లో డిసెంబ‌ర్ 13న పార్ల‌మెంట్‌పై దాడి జ‌ర‌గ్గా సరిగ్గా ఇదే రోజు ఈ ఘ‌ట‌న జ‌ర‌గ‌డం గ‌ర్హ‌నీయ‌మ‌ని, ఇది ముమ్మాటికీ భ‌ద్ర‌తా వైఫ‌ల్య‌మేన‌ని కార్తీ చిదంబ‌రం వ్యాఖ్యానించారు.