కులాంతర వివాహాలు ధర్మ సమ్మతమే

కులాంతర వివాహాలు ధర్మ సమ్మతమే అని సామాజిక సమరసత జాతీయ కన్వీనర్ శ్యాం ప్రసాద్ స్పష్టం చేశారు.  కులాంతర వివాహాలు చేసుకొని, సుదీర్ఘకాలం అన్యోన్య దాంపత్యం గడుపుతున్న ఆదర్శ దంపతులను వరంగల్ లో కాకతీయ ఫౌండేషన్ ఆధ్వర్యంలో సన్మానించారు. ఈ కార్యక్రమంలో ముఖ్యఅతిధిగా పాల్గొంటూ  కులాంతర వివాహాలు చేసుకున్న వారికి అందరం అండగా నిలబడాలని ఆయన సూచించారు.

వివాహం కేవలం ఇద్దరి వ్యక్తుల మధ్య పరిమితమైన వ్యవస్థ కాదని, రెండు కుటుంబాల మధ్య బంధం, అనుబంధం ఏర్పరచే వ్యవస్థ అని ఆయన తెలిపారు. `మా పెళ్లి మా ఇష్టం’ అంటే సరిపోదని ఆయన యువతకు హితవు చెప్పారు. వివాహం విషయంలో తమ ఎంపికల గురించి తల్లిదండ్రులకు నచ్చ చెప్పాలని, వారి మనోభావాలను మన్నించాలని సూచించారు.  కులాంతర వివాహం చేసుకోవడంతో పూర్తి కాలేదని జీవితంలో సమస్యలు ప్రారంభం అయినట్లుగా గుర్తించాలని చెప్పారు. గృహస్తులుగా అన్యోన్యంగా ఉంటూ,మీరూ సామాజిక బాధ్యతలను నిర్వహిస్తూ, సంతానాన్ని సంస్కార వంతులుగా తీర్చి దిద్దినపుడే మీరు ఆదర్శ దంపతులు అవుతారని శ్యాంప్రసాద్ చెప్పారు.