2024 లోక్‌సభ ఎన్నికలు సమీపిస్తుండడంతో కీలకమైన ఉత్తరప్రదేశ్ లో తిరిగి దాదాపు అన్ని సీట్లు గెలుపొందేవిధంగా పార్టీని పెద్ద ఎత్తున ప్రక్షాళనకు బిజెపి నాయకత్వం పూనుకొంది. శుక్రవారం 71 శాతం జిల్లా శాఖలలో మార్పులు చేసింది. 98 సంస్థాగత జిల్లాల అధ్యక్షుల జాబితాను పార్టీ ప్రకటించింది. రాష్ట్రంలోని ఆరు ప్రాంతాలలో, పశ్చిమ యుపిలో 17, కాన్పూర్ ప్రాంతంలో 13, బ్రజ్, కాశీ, అవధ్ ప్రాంతాలలో ఒక్కొక్కరికి 10, గోరఖ్‌పూర్‌లో తొమ్మిది జిల్లాల అధ్యక్షులను బిజెపి మార్చింది. పార్టీకి 19 జిల్లా యూనిట్లు ఉన్న పశ్చిమ యుపిలో గరిష్ట మార్పులు చేశారు.
14 లోక్‌సభ నియోజకవర్గాలను కలిగి ఉన్న పశ్చిమ యుపి జిల్లాలలో (దాని సంస్థాగత మ్యాప్ ప్రకారం) తన పనితీరును మెరుగుపరచుకోవాలని బిజెపి లక్ష్యంగా పెట్టుకుంది. 2014లో బీజేపీ మొత్తం 14 స్థానాలను గెలుచుకుంది. అయితే రెండేళ్ల తర్వాత సమాజ్‌వాదీ పార్టీ, బహుజన్ సం పార్టీ, రాష్ట్రీయ లోక్‌దళ్ లను ఉమ్మడిగా ఎదుర్కోవలసి రావడం, బీఎస్పీ గెలవడంతో బీజేపీ సంఖ్య ఏడుకి పడిపోయింది.
నాలుగు నియోజకవర్గాలు ఎస్పీ, మూడు బీఎస్పీ గెలుచుకున్నాయి. బీఎస్పీ ఇప్పుడు తటస్థ స్థితిని కొనసాగిస్తున్నప్పటికీ, అధికార పక్షం, ప్రతిపక్ష కూటమి ఇండియాలకు దూరంగా ఉంటున్నప్పటికీ ఎస్పీ, ఆర్ఎల్డిల బంధం ఇంకా కొనసాగుతోంది. ఈ సంస్థాగత ప్రక్షాళన ద్వారా 2024లో మరోసారి అన్ని సీట్లు గెలుచుకోవాలని బిజెపి చూస్తున్నది.
మొత్తంగా, 2019 లోక్‌సభ ఎన్నికల్లో ఓడిపోయిన 16 లోక్‌సభ స్థానాల పరిధిలోని 15 జిల్లాల్లో 14 జిల్లాల అధ్యక్షులను బీజేపీ మార్చింది. జౌన్‌పూర్‌ లో మాత్రమే మార్చలేదు. గత ఏడాది జరిగిన ఉపఎన్నికల్లో ప్రతిపక్షాల నుంచి రాంపూర్, అజంగఢ్ స్థానాలను బీజేపీకి కైవసం చేసుకున్నప్పటికీ, ఈ జిల్లాల్లో ఇప్పుడే అధ్యక్షులను మార్చింది.
భారీ సంస్థాగత మార్పులపై, బిజెపి రాష్ట్ర అధ్యక్షుడు భూపేంద్ర సింగ్ చౌదరి మాట్లాడుతూ, “వారిలో చాలా మంది తమ పదవీకాలాన్ని పూర్తి చేశారు. కొందరు ప్రజాప్రతినిధులుగా మారగా, మరికొందరు పార్టీ సంస్థలో భిన్నమైన పాత్రలను నిర్వహిస్తున్నారు. కొత్త జిల్లా అధ్యక్షులను నియమించే సమయంలో లోక్‌సభ ఎన్నికలకు ముందు ఏర్పడే రాజకీయ పరిస్థితులను కూడా పరిశీలించాము” అని చెప్పారు.
త్వరలో జిల్లా ఇన్‌చార్జిలను కూడా నియమిస్తామని చౌదరి తెలిపారు. కొంతమంది జిల్లా అధ్యక్షులపై ఫిర్యాదుల కారణంగా లేదా లోక్‌సభ ఎన్నికలకు ముందు ఆ యూనిట్లలో మరింత చురుకైన నాయకులు అవసరమని పార్టీ భావించినందున వారిని మార్చినట్లు పార్టీ వర్గాలు తెలిపాయి. ఈ నెల ప్రారంభంలో జరిగిన ఘోసి అసెంబ్లీ ఉప ఎన్నికలో పార్టీ ఓడిపోయిన మౌ జిల్లా అధ్యక్షుడిని తొలగించాలనే నిర్ణయం ప్రకటించిన మార్పులలో ముఖ్యమైనది.
ప్రవీణ్ గుప్తా స్థానంలో పార్టీ నూతన జిల్లా అధ్యక్షుడిగా నూపుర్ అగర్వాల్‌ను నియమించారు. డిసెంబర్ 2022లో జరిగిన ఖతౌలీ అసెంబ్లీ ఉపఎన్నికలో పార్టీ ఓడిపోయిన ముజఫర్‌నగర్‌లో, అలాగే గత ఏడాది లోక్‌సభ ఉపఎన్నికల్లో ఓటమిని ఎదుర్కొన్న మెయిన్‌పురిలో జిల్లా అధ్యక్షులను మార్చారు. విశేషమేమిటంటే, వారణాసి, గోరఖ్‌పూర్ వంటి కీలకమైన జిల్లాల మహానగర్, జిలా అధ్యక్షులను కొనసాగించారు. వారణాసి ప్రధానమంత్రి నరేంద్ర మోదీకి చెందిన లోక్‌సభ నియోజకవర్గం కాగా గోరఖ్‌పూర్ ముఖ్యమంత్రి యోగి ఆదిత్యనాథ్ సొంతగడ్డ. వారణాసిలో, విద్యాసాగర్ రాయ్ బిజెపి మహానగర్ అధ్యక్షుడిగా కొనసాగారు.
అయితే హన్సరాజ్ విశ్వకర్మ జిల్లా యూనిట్‌లో పార్టీ వ్యవహారాల ఇన్‌ఛార్జ్‌గా కొనసాగుతారు. ఈ సంవత్సరం ప్రారంభంలో విశ్వకర్మ ఎమ్యెల్సీగా ఎన్నిక కావడంతో వారణాసి జిలా యూనిట్‌లో మార్పు జరుగుతోందని అనుకున్నారు. కానీ, రాయ్ రెండోసారి, విశ్వకర్మ వరుసగా మూడోసారి పదవీ బాధ్యతలు స్వీకరించారు.
బహుశా లోక్‌సభ ఎన్నికలు సమీపిస్తున్నందున, వారణాసి నుండి ప్రధానమంత్రిగా ఉన్నందున, పార్టీ అక్కడ అనుభవజ్ఞులైన వ్యక్తులను కోరుకుంటున్నట్లు చెబుతున్నారు. గోరఖ్‌పూర్‌లో రాజేష్ గుప్తా మహానగర్ అధ్యక్షుడిగా, యుధిష్ఠిర్ సింగ్ జిలా యూనిట్ అధ్యక్షుడిగా కొనసాగుతారు. అయోధ్య మహానగర్‌లోని ముఖ్యమైన జిల్లా యూనిట్‌లో, అభిషేక్ మిశ్రా స్థానంలో కమలేష్ శ్రీవాస్తవ ఉన్నారు. అయితే అయోధ్యజిల్లాలో పార్టీ సంజీవ్ సింగ్‌ను కొనసాగించింది.
కేవలం జిల్లా స్థాయి నేతలనే కాకుండా, రాష్ట్రంలోని దాదాపు నాలుగో వంతు మంది ఎంపీలను కూడా లోక్‌సభ ఎన్నికల సమయంలో మార్చాలని బీజేపీ ఆలోచిస్తున్నట్లు చెబుతున్నారు. కొందరు కేంద్ర మంత్రులను సహితం తొలగించే అవకాశం ఉన్నట్లు బీజేపీ వర్గాలు చెబుతున్నాయి. ఈ మార్పులు చాలా వరకు పశ్చిమ, తూర్పు యూపీలో జరగవచ్చని భావిస్తున్నారు.
More Stories
ప్రజ్వల్‌ రేవణ్ణ వీడియోలపై సిబిఐ దర్యాప్తు
హర్యానా లో మద్దతు ఉపసంహరించుకున్న ముగ్గురు ఎమ్మెల్యేలు
కాంగ్రెస్ వస్తే రామ మందిరానికి బాబ్రీ తాళం.. అందుకే 400 సీట్లు