మణిపూర్‌లో క్రమేపీ సాధారణ పరిస్థితులు

మణిపూర్‌లో క్రమేపీ సాధారణ పరిస్థితులు నెలకొంటున్నాయి. ఓ వైపు సైన్యం సున్నిత ప్రాంతాలలో పహారా కాస్తోంది. మరో వైపు ఘర్షణ కారులపై తగు పర్యవేక్షణకు డ్రోన్లు, హెలికాప్టర్లను రంగంలోకి దించారు. పరిస్థితి కొంత మేరకు సద్దు మణగడంతో ఆదివారం మణిపూర్‌లోని కొన్ని ప్రాంతాలలో కర్ఫూను సడలించారు. భారత ఆర్మీ, అసోం రైఫిల్స్.. ఇప్పటి వరకు 23వేల మందికిపైగా ప్రజలను సురక్షిత ప్రాంతాలకు చేర్చాయి. మిలటరీ బేస్‍లు, శిబిరాలకు తరలించాయి. ఈ

గత కొద్ది రోజులుగా తీవ్ర స్థాయి హింసాత్మక తెగల తగవులతో రగిలిన మణిపూర్ ఆదివారం కొంత మేర ప్రశాంతతను సంతరించుకుందని అధికార వర్గాలు తెలిపాయి. మరో వైపు తెలంగాణ సహా వివిధ రాష్ట్ర ప్రభుత్వాలు ఇక్కడ చిక్కుపడ్డ తమ రాష్ట్రాల ప్రజలను , విద్యార్థులను తరలించేందుకు రంగంలోకి దిగాయి. చాలారోజుల పాటు రోడ్లపైకి రాలేని స్థితిలో ఉన్న పౌరులు ఇప్పుడు ఆంక్షలు సడలించడంతో అత్యధిక సంఖ్యలో వీధుల్లోకి వచ్చారు.

నిత్యావసర సరుకుల కొనుగోళ్లకు దిగారు. ఔషధాలు రోజువారి అవసరాలను సమకూర్చుకునేందుకు రావడంతో పలు చోట్ల సందడి నెలకొంది. ఇంఫాల్‌లో ఉదయం పూట కర్ఫూ సడలించారు. పది గంటలకు ఈ సడలింపు ముగిసింది. ఆ తరువాత ఆర్మీ, అస్సామ్ రైఫిల్స్ దళాలు రంగంలోకి దిగి ఫ్లాగ్‌మార్చ్ నిర్వహించాయి. మణిపుర్‌లో ఆర్మీ.. ఏరియల్ వ్యూ నిర్వహిస్తోంది. హెలికాప్టర్లు, డ్రోన్లతో పరిస్థితులపై ఎప్పటికప్పుడు నిఘా వేస్తోంది. ఇంపాల్ లోయపై ప్రత్యేక దృష్టి సారించింది.

ఘర్షణాయుత రాష్ట్రంలో శాంతి భద్రతల పరిరక్షణకు 120 నుంచి 125 వరకూ సైనిక దళాలు తరలిరావడం, దాదాపుగా పదివేల మంది సైనికులు, పారామిలిటరీ , సిఆర్‌పిఎఫ్ జవాన్లతో పరిస్థితిని చక్కదిద్దేందుకు చర్యలు తీసుకోవడంతో పరిస్థితి చక్కబడుతుందని అధికారులు తెలిపారు. ఘర్షణలు తలెల్తిన చురాచంద్‌పూర్‌లో కూడా ఉదయం ఏడు నుంచి కొద్ది సేపు కర్ఫూ సడలించారు.