పునరుద్దరించలేని విధంగా వైవాహిక బంధం దెబ్బతింటే ఆర్టికల్ 142 ప్రకారం వారికి విడాకులను మంజూరు చేయవచ్చని సుప్రీంకోర్టు సోమవారం సంచలన తీర్పు చెప్పింది. పరిస్థితులను బట్టి పరస్పర అంగీకారంతో విడాకుల కోసం ఆరు నెలల తప్పనిసరి నిరీక్షణ వ్యవధిని రద్దు చేయవచ్చని పేర్కొంది.
`వివాహం కోలుకోలేని విధంగా విచ్ఛిన్నం ఎప్పుడు జరుగుతుందో నిర్ణయించగల అంశాలను కూడా మేం నిర్దేశించాం’ అని న్యాయమూర్తులు జస్టిస్ సంజయ్ కిషన్ కౌల్, జస్టిస్ సంజీవ్ ఖన్నా, జస్టిస్ ఏఎస్ ఓకా, జస్టిస్ విక్రమ్ నాథ్, జస్టిస్ జేకే మహేశ్వరిలతో కూడిన రాజ్యాంగ ధర్మాసనం స్పష్టం చేసింది.
ముఖ్యంగా మెయింటెనెన్స్, భరణం, పిల్లల హక్కులకు సంబంధించి అంశాలను ఎలా బ్యాలెన్స్ చేయాలో కూడా ధర్మాసనం వివరించింది. హిందూ వివాహ చట్టంలోని సెక్షన్ 13బి కింద నిర్దేశించిన విధంగా పరస్పర అంగీకారంతో విడాకుల కోసం తప్పనిసరి నిరీక్షణ కాలాన్ని ఆర్టికల్ 142 ప్రకారం తన అపారమైన అధికారాలను వినియోగించుకుని సుప్రీంకోర్టు రద్దు చేయగలదా? అనే అంశంపై రాజ్యాంగ ధర్మాసనం విచారణ చేపట్టింది.
కోలుకోలేని విధంగా విచ్ఛిన్నమైన వివాహాలను రద్దు చేయవచ్చా? అనే అంశాన్ని పరిగణనలోకి తీసుకోవాలని విచారణ సందర్భంగా రాజ్యాంగ ధర్మాసనం నిర్ణయించింది. ‘ప్రాథమిక హక్కుల దృష్ట్యా ఆర్టికల్ 142ని పరిగణనలోకి తీసుకోవాలి.. ఇది రాజ్యాంగ పరిధిని దాటి న్యాయస్థానం పూర్తి న్యాయం చేయడానికి అధికారం కలిగి ఉంటుంది’ అని బెంచ్ పేర్కొంది.
రాజ్యాంగంలోని ఆర్టికల్ 142 ప్రకారం పెండింగ్‌లో ఉన్న ఏ విషయంలోనైనా పూర్తి న్యాయం చేయడానికి అత్యున్నత న్యాయస్థానం ఉత్తర్వులు, ఆదేశాల అమలుతో వ్యవహరిస్తుంది. ఈ కేసును ఏడేళ్ల కిందట ఐదుగురు న్యాయమూర్తుల ధర్మాసనానికి జస్టిస్ శివ కీర్తి సింగ్, జస్టిస్ ఆర్ భానుమతిల ధర్మాసనం సిఫార్సు చేసింది. దీనిపై రాజ్యాంగ ధర్మాసనం విచారణను గతేడాది సెప్టెంబరు 29న పూర్తిచేసి తీర్పును రిజర్వులో ఉంచింది. తాజాగా సోమవారం తీర్పు వెలువరించింది.
More Stories
వన్డేలు, టీ20లో అగ్రస్థానంలో టీమ్‌ఇండియా
సర్వేల పేరుతో ఓటర్ల వివరాలు సేకరిస్తే చర్యలు
సప్తపదితో ముడిపడినదే హిందూ వివాహం