నేటి నుండే గంగా పుష్కరాలు

హిందువులు అత్యంత పవిత్రంగా భావించే గంగా పుష్కరాలు శనివారం   ప్రారంభంకానున్నాయి. 12ఏళ్లకి ఒకసారి వచ్చే ఈ పుష్కరాలు మే 3 వరకు కొనసాగనున్నాయి. అలహాబాద్‌, గంగోత్రి, గంగాసాగర్‌, హరిద్వార్‌, బద్రీనాథ్‌, కేదార్‌నాథ్‌ సంగమం ప్రయాగ నగరాలలో పుష్కరాల సంరంబం ఆరంభమవుతున్నది.

పుష్కరాల సమయంలో ఆయా నదుల్లో స్నానమాచరిస్తే సకల పాపాల నుంచి విముక్తమవుతామని ప్రతీతి. ఈ సమయంలో బ్రహ్మాది దేవతలంతా పుష్కరునితో సహా నదీజలాల్లో ప్రవేశిస్తారని చెప్తారు. రోజుకు 25 లక్షల దాకా జనం గంగా స్నానం ఆచరిస్తారు. కనీసం కోటి మంది నిత్యం పూజలోనో, వ్రతంలోనో, యజ్ఞంలోనో, పితృకార్యంలోనో గంగను తలుచుకుంటుంటారు.

గంగానది పుట్టింది మొదలు సముద్రంలో కలిసే దాకా ప్రతీది భారతీయులకు పవిత్రం. గంగా ఒడ్డున ఎన్నో నాగరికతలు పుట్టాయి. మరెన్నో సామ్రాజ్యాలు వెలిశాయి.  ఈ నేపథ్యంలో అధికారులు అన్ని ఏర్పాట్లు ముమ్మరం చేశారు. బృహస్పతి సంవత్సరంలో ఒక రాశిలో ప్రవేశిస్తాడు. అంటే.. ఒక రాశిలో ప్రవేశించిన తర్వాత, తిరిగి అదే రాశిలో సంచరించాలంటే 12ఏళ్లు పడుతుంది.

ఈ నేపథ్యంలో శనివారం మేషరాశిలోకి బృహస్పతి ప్రవేశిస్తాడు. ఇది హిందువులకు అత్యంత పవిత్రం. దీనినే గంగా పుష్కరాలు అని పిలుస్తారు.  బృహస్పతి సంబంధిత రాశిలోకి ప్రవేశించిన తొలి 12రోజులను ఆది పుష్కరాలని, చివరి 12 రోజులు అంత్య పుష్కరాలుగా పిలుస్తారు. బృహస్పతి మీనరాశిలో ప్రవేశించినప్పడు అంటే 2023, మే 3న గంగానది పుష్కరాలు ముగుస్తాయి.

ఉత్తరాఖండ్​లో జన్మించిన గంగా నది పలు రాష్ట్రాల్లో ప్రవహించి, చివరికి సముద్రంలో కలుస్తుంది. ఈ మార్గంలో అనేక పుష్కర ఘాట్​లు ఉన్నాయి. గంగానదికి చాలా పేర్లున్నాయి. భగీరథ ప్రయత్నం వల్ల వచ్చింది కాబట్టి భాగీరథి అంటారు. జహ్ను పొట్టంలోంచి పుట్టింది కాబట్టి జాహ్నవిగా కూడా పిలుస్తారు. భారతీయులు ఒక్కసారైనా మునిగి తీరాలనుకునే గంగా ప్రధానమైనది.

కాశీనాథుడు కొలువుదీరిన పవిత్ర వారణాసి క్షేత్రంలో గంగాపుష్కర స్నానానికి 64 స్నాన ఘాట్‌లు ఉన్నాయి. అన్నింటిలోకి మణికర్ణిక ఘాట్‌ ముఖ్యమైనది. ఎండా కాలం వల్ల ఉష్ణోగ్రతలు పెరుగుతున్న నేపథ్యంలో ప్రజలకు ఉపశమనం కలిగించే రీతిలో అధికారులు చర్యలు తీసుకున్నారు. అనేక పుష్కర ఘాట్​లలో మంచి నీటి కేంద్రాలు ఏర్పాటు చేశారు. మరుగుదొడ్లు, స్నానాల గదులు, బట్టలు మార్చుకోవడం కోసం ప్రత్యేక రూమ్​లు సిద్ధం చేశారు.