తెలంగాణాలో పరిస్థితుల పట్ల గవర్నర్ తమిళసై ఆందోళన

తెలంగాణ రాజ్ భవన్‌లో 74వ రిపబ్లిక్ డే వేడుకలు ఘనంగా నిర్వహించారు. రాష్ట్ర ప్రభుత్వ ప్రధాన కార్యదర్శి శాంతికుమారి, డిజిపి అంజనీ కుమార్, ఇతర ప్రభుత్వ ఉన్నతాధికారులు రిపబ్లిక్ డే వేడుకలకు హాజరయ్యారు. ఈ సందర్భంగా గవర్నర్ తెలంగాణ ప్రభుత్వంపై పరోక్షంగా విమర్శలు చేశారు. ముఖ్యమంత్రి చంద్రశేఖర్ రావు లక్ష్యంగా కొన్ని వాఖ్యలు చేశారు. తెలంగాణ గౌరవాన్ని నిలబెట్టడానికి ప్రతి ఒక్కరూ కృషి చేయాలని ఆమె అభిలాష వ్యక్తం చేశారు.

రాష్ట్ర ప్రభుత్వ పని తీరుపై తీవ్ర స్థాయిలో ఆమె అసంతృప్తి వ్యక్తం చేశారు. కష్టపడి పనిచేయడం, నిజాయితీ తనకు ఉన్న బలాలు అని పేర్కొంటూ తనకు తెలంగాణ అంటే చాలా ఇష్టమని ఆమె చెప్పారు. కొందరికి తనంటే ఇష్టం ఉండకపోవచ్చని, అయితే తెలంగాణ అభివృద్ధిలో ఖచ్చితంగా తన పాత్ర ఉంటుందని చెప్పారు. అభివృద్ధి అంటే భవనాల నిర్మాణం కాదని, జాతి నిర్మాణం అంటూ పరోక్షంగా నూతన సచివాలయం గురించి ప్రస్తావించారు. తెలంగాణలో జాతీయ రహదారుల విస్తరణకు భారీగా నిధులు కేటాయిస్తున్న ప్రధాని మోదీక గవర్నర్ కృతజ్ఞతలు తెలిపారు.