ఢిల్లీ ఎయిమ్స్ సర్వర్ల హ్యాకింగ్ చైనా హ్యాకర్ల పనా!

చైనాకు చెందిన రెండు రాన్‌సమ్‌వేర్ (కంప్యూటర్ వైరస్) గ్రూపులు `ఎంపరర్ డ్రాగన్ ఫ్లై’, `బ్రోన్జ్ స్టార్లైట్’ (దేవ్-0401)లు   ప్రపంచవ్యాప్తంగా ఫార్మా సంస్థలను లక్ష్యంగా చేసుకుని సైబర్ దాడులు జరుపుతున్నట్టు సైబర్ నిపుణులు చెబుతున్నారు. అయితే ఢిల్లీ ఎయిమ్స్‌ సర్వర్ల హ్యాకింగ్ ఘటనలో ఈ గ్రూపుల ప్రమేయం ఉందా అనేది ఇంకా ధ్రువీకరణ కావాల్సి ఉంది. లైఫ్  అనే మరో సంస్థను కూడా కూడా సైబర్ నిపుణులు అనుమానిస్తున్నారు.

ఎయిమ్స్‌లో ఈనెల 23న తొలిసారి సర్వర్లు మొరాయించినట్టు గుర్తించగా, ఇందులో 3 నుంచి 4 కోట్ల మంది రోగుల సమాచారం ఉన్నట్టు ఒక అంచనా. వీవీఐపీలు, రాజకీయ నేతలు, సెలబ్రెటీల సమాచారం కూడా ఇందులో ఉందంటున్నారు. హ్యాకింగ్ కారణంగా ఈ డాటా ప్రమాదంలో పడిందని, ఈ డాటాను హ్యాకర్లు డార్క్‌ వెబ్‌లో అమ్మకానికి పెట్టే అవకాశం ఉందని అనుమానాలు ఉన్నాయి.

అయితే, ఇంతవరకు అలాంటిదేమీ జరగలేదని విశ్వసనీయ వర్గాలు చెబుతున్నాయి. మొత్తం ఐదు ప్రధాన సర్వర్లు సైబర్ దాడికి గురయ్యాయని, ఇందులో ఒక సర్వర్‌ను హాంకాంగ్ నుంచి హ్యాక్ చేసినట్టు తెలుస్తోంది. సైబర్ దాడికి గురైన సర్వర్ల మిర్రర్ ఇమేజ్‌లు ఫోరెన్సిక్ ల్యాబ్ విశ్లేషణకు పంపినట్టు ఢిల్లీ పోలీసులు తెలిపారు.

ఎయిమ్స్ అడ్మినిస్ట్రేషన్, ఇతర ఏజెన్సీలు ఆయా సర్వర్లను పునరుద్ధరించి, తిరగి సేవలందించే ప్రక్రియ సాగిస్తున్నారు. కాగా, హ్యాకర్లు రూ.200 కోట్లు క్రిప్టో కరెన్సీ రూపంలో చెల్లించాలని డిమాండ్ చేసినట్టు వార్తలు వచ్చాయి.  అయితే, ఆ విషయం ఏదీ తమ దృష్టికి ఎయిమ్స్ అధికారులు తీసుకురాలేదని ఢిల్లీ పోలీసులు చెబుతున్నారు.

ఎయిమ్స్ సెక్యూరిటీ అధికారి ఫిర్యాదు మేరకు బలవంతపు వసూళ్లు, సైబర్ టెర్రరిజం కింద ఢిల్లీ పోలీసులు ఎఫ్ఐఆర్ నమోదు చేశారు. మరోవైపు సర్వర్ల హ్యాకింగ్ ద్వారా జరిగిన నష్టాన్ని సాధ్యమైనంత తగ్గించేందుకు ఇండియన్ కంప్యూటర్ ఎమర్జెన్సీ రెస్పాన్స్ టీమ్, సెంటర్ ఫర్ డవలప్‌మెంట్ ఆఫ్ అడ్వాన్స్‌డ్ కంప్యూటింగ్ అండ్ నేషనల్ ఇన్ఫర్మేటిక్స్ సెంటర్, రెండు ఇంటెలిజెన్స్ ఏజెన్సీలు తలమునకలవుతున్నాయి.