ఎమ్మెల్సీ కవితకు సీబీఐ నోటీసులు

రాజకీయ ప్రకంపనలు సృష్టిస్తున్న ఢిల్లీ లిక్కర్ స్కాం కేసులో ముఖ్యమంత్రి కేసీఆర్ కుమార్తె, టీఆర్ఎస్ ఎమ్మెల్సీ  కల్వకుంట్ల కవితకు సీబీఐ అధికారులు నోటీసులు జారీ చేశారు. అయితే, 160 సీఆర్పీసీ కింద అధికారులు నోటీసులు ఇచ్చారు. డిప్యూటీ సూపరింటెండెంట్ ఆఫ్ పోలీస్ సీబీఐ అలోక్ కుమార్ ఈ నోటీసులు జారీ చేశారు.

కేసు విచారణలో భాగంగా కాకుండా కేవలం వివరణ కోసమే నోటీసులు ఇచ్చినట్లు సీబీఐ అధికారులు పేర్కొన్నారు. ఈ నెల 6 వ తేదీన  తనకు వీలైన సమయంలో హైదరాబాదా లేదా వీలైతే ఢిల్లీ సీబీఐ కార్యాలయానికి వచ్చి కేసు గురించి వివరణ ఇవ్వాలని అధికారులు నోటీసుల్లో పేర్కొన్నారు.

ఢిల్లీ లిక్కర్ స్కాం తెర మీదకు వచ్చిన రోజు నుంచి ఎమ్మెల్సీ కల్వకుంట్ల కవిత పేరు వినిపిస్తోంది. అయితే, మొదటిసారిగా ఈ కేసులో అమిత్ అరోరా రిమాండ్ రిపోర్టులోనే  కవిత పేరు అధికారికంగా బయటకు వచ్చింది. ఈడీ అధికారులు చేర్చిన పేర్లలో కల్వకుంట్ల కవిత అనే పేరు ఉంది.  32 పేజీల రిపోర్టులో మూడు చోట్ల కవిత పేరును అధికారులు ప్రస్తావించారు.

ఢిల్లీలో సంచలనం సృష్టించిన మద్యం కేసులో సౌత్ గ్రూపు నుంచి రూ. 100 కోట్లు తరలించినట్లు ఈడీ అధికారులు ఇప్పటికే గుర్తించారు. బేగంపేట ఎయిర్‌పోర్టు నుంచి ప్రైవేట్ విమానాల్లో డబ్బు తరలించినట్లు అనుమానిస్తున్నారు. ఈ ‘సౌత్ గ్రూప్‌’ను శరత్ రెడ్డి, కె కవిత, మాగుంట నియంత్రించిన ట్లు తాజా రిమాండ్ రిపోర్టులో పేర్కొనడం గమనార్హం.

 ఈ కుంభకోణంలో కవిత పాత్ర ఏమిటి? ఆమెతో పాటు తెలుగు రాష్ట్రాలకు చెందిన అరబిందో ఫార్మా డైరెక్టర్‌ శరత్‌చంద్రారెడ్డి, ఎంపీ మాగుంట శ్రీనివాసులు రెడ్డి.. వీరంతా కలిసి ముడుపులను ఎవరికి ఇచ్చారు? ఎలా లబ్ధి పొందారు? అనే వివరాలను కోర్టుకు సమర్పించిన రిపోర్టులో ఈడీ అధికారులు స్పష్టంగా వివరించారు.

ఇదిలా ఉండగా, ఈ వ్యవహారంలో కార్యకలాపాల నిమిత్తం ఉపయోగించిన 10 సెల్‌ఫోన్లను కవిత ధ్వంసం చేసినట్లు తాజా రిమాండ్ రిపోర్టులో ఈడీ పేర్కొంది. సాక్ష్యాలను ధ్వంసం చేసినట్లుగా గుర్తించినట్లు తెలిపింది. ఈ కేసులో మొత్తం 36 మంది రూ. 1.38 కోట్ల విలువైన 170 మొబైల్‌ ఫోన్లను ధ్వంసం చేశారని ఈడీ పేర్కొంది.

అమిత్‌ అరోరా విచారణలో కవిత పేరు బయటపడడం, ఈడీ కోర్టుకు సమర్పించిన రిమాండ్‌ రిపోర్టులో ఆమె పేరు ప్రస్తావించడం.. ఆ తర్వాత 48 గంటలు గడిచేలోపే ఆమెకు సీబీఐ నోటీసులు జారీ చేయడం గమనార్హం.