కాంగ్రెస్ పార్టీ కి మర్రి శశిధర్ రెడ్డి రాజీనామా

ప్రస్తుతం పార్టీ ఉన్న పరిస్థితుల్లో తాను కఠినమైన నిర్ణయం తీసుకోక తప్పలేదని తెలిపారు. కాంగ్రెస్ పరిస్థితి దిగజారిపోయిందని,  ప్రజల ఆకాంక్షల మేరకు పోరాటం చేయలేకపోతోందని చెప్పారు. రాష్ట్రంలోని పార్టీ పరిస్థితుల గురించి తాను చాలాసార్లు అధిష్టానానికి లేఖలు రాశానని, ఈ విషయంపై సోనియాగాంధీ కూడా స్పందించారని చెప్పారు.

అయితే.. సోనియా కూడా ఇప్పుడున్న పరిస్థితుల్లో నిస్సహాయురాలిగా ఉన్నారని విచారం వ్యక్తం చేశారు. కాంగ్రెస్ పార్టీలో డబ్బు ఉన్నవాళ్లదే మాట చెల్లుతుందని అంటూ  గతంలో ఎంపీ ఉత్తమ్ కుమార్ రెడ్డి కూడా పీసీసీ అధ్యక్షుడిగా రాజీనామా చేయకుండా డ్రామాలు ఆడారని ఆరోపించారు. కాంగ్రెస్ లో గెలిచిన వాళ్లు పార్టీలో ఉంటారో లేదో అన్న అలోచన ప్రజల్లో నాటుకుపోయిందని తెలిపారు.

కోకాపేట భూముల విషయం ఏమైందని మర్రి శశిధర్ రెడ్డి ప్రశ్నించారు. రేవంత్ రెడ్డి బ్లాక్ మెయిలర్ అనే పేరు జనాల్లో ఉందని ఆరోపించారు. కాంగ్రెస్ పార్టీలో కేసీ వేణుగోపాల్ ద్రోహిలా మిగిలిపోతాడని వ్యాఖ్యానించారు. మునుగోడు ఉప ఎన్నికలో వచ్చిన ఓట్లతో తాను సంతృప్తి చెందానని రేవంత్ అన్నారని చెప్పారు. మునుగోడు నుంచే కాంగ్రెస్ పార్టీ పతనం ప్రారంభమైందని చెప్పారు.

రేవంత్ రెడ్డి.. బ్లాక్ మెయిల్ రాజకీయాలకు మాత్రమే పని చేస్తారని ఆరోపిచారు. బంగారు బాతు గుడ్డు పెట్టే రేవంత్ రెడ్డిని ఠాగుర్ కాపాడుకుంటున్నారని చెప్పారు. రాష్ట్రానికి ఇప్పుడున్న ఇన్ చార్జ్ ఠాగూర్ మరో ద్రోహి అంటూ మండిపడ్డారు.

అవినీతిపై మాట్లాడే అర్హతను కాంగ్రెస్ పార్టీ కోల్పోయిందని మర్రి శశిధర్ రెడ్డి స్పష్టం చేశారు. ఎంపీ కోమటిరెడ్డి వెంకట్ రెడ్డిని హోంగార్డు అని సంబోధించడం వల్ల  కాంగ్రెస్ పార్టీలో ఉన్న వారంతా హోంగార్డ్స్, రేవంత్ మాత్రమే ఐపీఎస్ అధికారా..? అని ఎద్దేవా చేశారు. ఇవాళ హోంగార్డ్ పదవి నుండి తాను తప్పుకుంటున్నందుకు చాలా సంతోషంగా ఉందని తెలిపారు. గీత దాటితే సీనియర్ నాయకులపైనా చర్యలు తీసుకుంటామని రాహుల్ గాంధీ మాట్లాడడం తనకు బాధ కల్గించిందని పేర్కొన్నారు.

పార్టీలో తాను చాలా సీనియర్ నాయకుడని చెప్పారు. ఏదైనా అంశంపై కాంగ్రెస్ పార్టీ ఇవాళ మాట్లాడితే ప్రజలు నమ్ముతారా..? అని ప్రశ్నించారు.