అర్వింద్ ఇంటిపై టీఆర్‌ఎస్ గూండాల దాడి పిరికిపంద చర్య

నిజామాబాద్ ఎంపీ ధర్మపురి అర్వింద్ ఇంటిపై టీఆర్‌ఎస్ గూండాల దాడి పిరికిపంద చర్య అని పేర్కొంటూ బీజేపీ జాతీయ ప్రధాన కార్యదర్శి తరుణ్ చుగ్ గారు తీవ్రంగా ఖండించారు. అధికార టీఆర్ఎస్ నేరపూరిత చర్యలతో భయానక వాతావవరణం సృష్టిస్తోందని ఆగ్రహం వ్యక్తం చేశారు.   దాడులకు తెగబడ్డ వారిపై పోలీసులు క్రిమినల్ కేసు నమోదు చేయాలని డిమాండ్ చేశారు.

 ప్రజల్లో బిజెపి కి పెరుగుతున్న ఆదరణ నేపథ్యంలో కేసీఆర్ ప్రభుత్వం తీవ్ర భయాందోళనలకు గురైందని, అందుకే రాజ్యాంగ విరుద్ధంగా, హింసాత్మక చర్యలకు పాల్పడుతోందని తరుణ్ చుగ్ ధ్వజమెత్తారు.  టీఆర్ఎస్ అగ్రనేతల సూచనలు, ఆదేశాలు, పథక రచనతోనే ఈ దాడి జరిగిందని ఆయన ఆరోపించారు. 

కేసీఆర్ అభద్రతా భావంతో ఉన్నందునే ఎంపీ అర్వింద్ ఇంటిపై దాడికి దిగారని కేంద్ర పార్లమెంటరీ వ్యవహారాల శాఖ మంత్రి ప్రహ్లాద్ జోషి అన్నారు. టీఆర్ఎస్ నేతలు గూండాల్లా ప్రవర్తిస్తున్నారని,  ఈ దాడిని తీవ్రంగా ఖండిస్తున్నామని చెప్పారు. దిల్‌‌సుఖ్ నగర్‌‌‌‌లో ఆయన మీడియాతో మాట్లాడారు. కవితను ఆమె కుటుంబ పార్టీలోనే ఉండాలని కోరుకుంటున్నామని, అవినీతికి పాల్పడే వాళ్లు మాకెందుకని ప్రశ్నించారు.