పాకిస్థాన్‌తో చర్చల ప్రసక్తే లేదని అమిత్ షా స్పష్టం

పాకిస్థాన్‌తో చర్చల ప్రసక్తే లేదని కేంద్ర హోం మంత్రి అమిత్ షా స్పష్టం చేశారు. ప్రధాన మంత్రి నరేంద్ర మోదీ నేతృత్వంలోని కేంద్ర ప్రభుత్వం జమ్మూ-కశ్మీరు నుంచి ఉగ్రవాదాన్ని తుడిచి పెడుతుందని, దేశంలో అత్యంత ప్రశాంతతగల ప్రాంతంగా ఈ కేంద్ర పాలిత ప్రాంతాన్ని మార్చుతుందని భరోసా ఇచ్చారు.

పాకిస్థాన్‌తో చర్చలు జరపాలని కొందరు అంటున్నారని చెబుతూ ఆ దేశంతో మనం ఎందుకు చర్చలు జరపాలని అమిత్ షా ప్రశ్నించారు. మనం చర్చలు జరిపేది లేదని తేల్చి చెప్పారు. మనం బారాముల్లా ప్రజలతో మాట్లాడతాం, కశ్మీరు ప్రజలతో మాట్లాడతాం అని తెలిపారు.

సుసంపన్నమైన, శాంతియుతమైన జమ్మూ కాశ్మీర్ గురించి ప్రధానమంత్రి నరేంద్ర మోదీ దార్శనికతను నెరవేర్చడానికి, సమన్వయంతో కూడిన ఉగ్రవాద వ్యతిరేక కార్యకలాపాలను చురుకుగా నిర్వహించాలని అమిత్ షా భద్రతా బలగాలను, పోలీసులను కోరారు.