బీఆర్ఎస్ పేరుతో కేసీఆర్ మరో డ్రామా… బిజెపి ఎద్దేవా

బిఆర్ఎస్ రాజకీయ పునరేకీకరణ కానే కాదని, వివిధ రాష్ట్రాల్లో ఉన్న రాజకీయ నిరుద్యోగుల, కాలం చెల్లిన నేతల ఏకీకరణ మాత్రమే అని బీజేపీ ఓబీసీ మోర్చా జాతీయ అధ్యక్షులు, పార్లమెంటరీ పార్టీ బోర్డు సభ్యులు డాక్టర్ కె.లక్ష్మణ్ స్పష్టం చేశారు.  తెలంగాణలో దోచుకున్న సొమ్ము లెక్క చెప్పలేక తన సొంత షోకుల కోసం ఖర్చు పెట్టడానికి ఆడుతున్న డ్రామాలివి అని ఆయన మండిపడ్డారు.

మునుగోడు ఎన్నికల నుండి రాష్ట్ర ప్రజలను మళ్ళించే ఉద్దేశంతో కేసీఆర్ చేస్తున్న విన్యాసాలను ప్రజలకు అర్ధమైందని చెబుతూ మునుగోడు బీఆర్ఎస్ కు తెలంగాణ ప్రజలు వీఆర్ఎస్ ఇవ్వడం ఖాయం అని తేల్చి చెప్పారు. తెలంగాణలో టీఆర్ఎస్ కు నూకలు చెల్లినయ్, అందుకే బీఆర్ఎస్ పేరుతో మరో కొత్త డ్రామా చేస్తున్నారని దుయ్యబట్టారు.

కేసీఅర్ 8 ఏండ్ల పాలనలో తెలంగాణ ప్రజలకు చేసింది ఏంటో ముందు చెప్పాలని ఆయన నిలదీశారు.  ధనిక రాష్ట్రమైన తెలంగాణను అప్పులు పాల్జేసి యావత్ రాష్ట్రాన్ని బ్యాంకులకు, కార్పొరేషన్లకు కుదువ పెట్టిన కేసీఆర్…. ధనిక రాష్ట్రాన్ని అప్పుల కుప్పగా మార్చడమే బీఆర్ఎస్ విధానమా? అని ప్రశ్నించారు.

టీఆర్ఎస్ ను బీఆర్ఎస్ గా మారుస్తూ నిర్ణయం తీసుకోవడంతో తెలంగాణకు సీఎం కేసీఆర్ కు ఉన్న బంధం పూర్తిగా తెగిపోయిందని బీజేపీ జాతీయ కార్యవర్గ సభ్యుడు, ఎమ్మెల్యే ఈటల రాజేందర్ పేర్కొన్నారు. ఉద్యమ పార్టీని ఖతం చేసి, ఉద్యమకారులను మర్చిపోయేటట్టు చేసి, కేసీఆర్ ముద్ర ఉండే పార్టీని స్థాపించారని ఆయన  చెప్పారు.

ఒక ప్రాంతీయ పార్టీ జాతీయ ఆశయాన్ని పెంచుకోవడం ఇదే మొదటిసారి కాదని, 1947 నుంచి అనేక ప్రాంతీయ పార్టీలు ప్రయత్నించి విఫలమయ్యాయని ఆయన గుర్తు చేశారు.  ఏఐడీఎంకే, డీఎంకే, టిడిపి, ఎస్పీ, బీఎస్పీ, ఆర్జేడీ, జేడీయూ, టిఎంసి, తాజాగా ఆప్ వంటివి జాతీయ పార్టీలు కావడానికి విఫల ప్రయత్నాలు చేశాయని తెలిపారు. 

టీఆర్‌ఎస్‌ పేరును బీఆర్‌ఎస్‌గా మార్చడం ద్వారా ఒక పార్టీ జాతీయ పార్టీగా ఎలా అవతరిస్తుంది? అని ఆయన విస్మయం వ్యక్తం చేశారు. ఒక పార్టీ జాతీయ పార్టీగా గుర్తింపు పొందాలంటే బహుళ రాష్ట్రాల్లో గణించదగిన ఓటరు మద్దతు పొందాలని చెప్పారు.

‘తెలంగాణ మోడల్’ లేదని, అది కేవలం సీఎం కేసీఆర్ కల్పిత ఊహలోనే ఉందని బీజేపీ విశ్వసిస్తోందని ఆయన తెలిపారు.  ఉనికిలో లేని మోడల్‌ను దేశానికి విక్రయించలేరని స్పష్టం చేశారు. టీఆర్‌ఎస్‌ పేరును బీఆర్‌ఎస్‌గా మార్చడం వల్ల తన సొంతగడ్డను కోల్పోవాల్సి వస్తుందని చెబుతూ, అదే సమయంలో ఆయన వ్యర్థమైన జాతీయ ఆశయానికి శ్రీకారం చుట్టారని తెలిపారు.