బీహార్ రాష్ట్రంలోని పాట్నా(నగర పర్యటన సమయంలో ప్రధానమంత్రి నరేంద్రమోదీని హతమార్చేందుకు పాపులర్ ఫ్రంట్ ఆఫ్ ఇండియా కుట్ర పన్నిందని తాజాగా నేషనల్ ఇన్వెస్టిగేటివ్ ఏజెన్సీ (ఎన్ఐఏ) దర్యాప్తులో వెల్లడైంది. పీఎఫ్ఐ కార్యాలయాలు, నేతల ఇళ్లపై ఇటీవల ఎన్ఐఏ, ఈడీ చేసిన దాడుల్లో ఈ విషయం వెలుగు చూసింది.
ఈ ఏడాది జులై నెలలో ప్రధాని మోదీ పాట్నా పర్యటన సందర్భంగా పీఎఫ్ఐ సభ్యులు దాడికి విఫలయత్నం చేశారని దర్యాప్తులో తేలింది. ప్రధానిపై దాడి చేసేందుకు పీఎఫ్ఐ పలువురు కార్యకర్తలకు శిక్షణ కూడా ఇచ్చారని వెల్లడైంది. ప్రధానితో పాటు యూపీలోని పలువురు ప్రముఖులపై దాడికి పీఎఫ్ఐ మారణాయుధాలు కూడా సమకూర్చుకున్నారని తేలింది.
బీహార్ పోలీసులు తెలిపిన వివరాల ప్రకారం, అదుపులోకి తీసుకున్న అథర్ పర్వేజ్, మహ్మద్ జల్లావుద్దీన్ అనే ద్వయం కేరళ, పశ్చిమ బెంగాల్, యూపీ, తమిళనాడుకు చెందిన యువకులకు ఉగ్రవాద శిక్షణ ఇచ్చినట్లు గుర్తించారు. బీహార్‌లోని ఫుల్వారీ షెరీఫ్ ప్రాంతం నుంచి ఉగ్రవాదులను అరెస్టు చేశారు. అదుపులో ఉన్న ఇద్దరు ఉగ్రవాదులు రిటైర్డ్ పోలీసు అధికారి మహ్మద్ జల్లావుద్దీన్, మాజీ సిమి సభ్యుడు, పిఎఫ్ఐ- ఎస్డిపిఐ క్రియాశీల కార్యకర్త అథర్ పర్వేజ్‌గా గుర్తించారు.
జూలై 12న ప్రధాని పాట్నాలో పాల్గొన్న కార్యక్రమాన్ని లక్ష్యంగా చేసుకుని ఉగ్రవాదులు ప్లాన్ చేశారు. తదుపరి విచారణ కోసం ఉగ్రవాదులు ఆయుధ శిక్షణ ఇస్తున్న సీసీటీవీ ఫుటేజీలు, సాక్షుల వాంగ్మూలాలను సేకరించారు. దేశంలో జాతీయ వ్యతిరేక కార్యకలాపాలను నిర్వహించడానికి పర్వేజ్ డబ్బును అందుకున్నాడు. నిధులకు సంబంధించిన పత్రాలను ఎన్‌ఫోర్స్‌మెంట్ విభాగానికి అందజేసినట్లు బీహార్ పోలీసులు తెలిపారు.
దేశ వ్యతిరేక కార్యకలాపాలను వ్యాప్తి చేసేందుకు ఉగ్రవాదులు ‘ఇండియా విజన్ 2047’ పేరుతో 8 పేజీల పొడవైన పత్రాలను తమలో పంపిణి చేసిన్నట్లు కొద్దిరోజుల క్రితమే వెల్లడైనది. “10 శాతం ముస్లిం కమ్యూనిటీ మనతో నిలబడితే, పిరికి మెజారిటీ కమ్యూనిటీని సులభంగా లొంగదీసుకుని, మన స్వంత దేశాన్ని సృష్టించుకోగలమనే విశ్వాసం పిఎఫ్ఐకి ఉంది” అని ఆ పత్రంలో తమ కార్యాచరణ లక్ష్యంగా స్పష్టంగా పేర్కొన్నారు.
అందుకోసం, టర్కీ, పాకిస్థాన్‌ వంటి ఇస్లామిక్‌ దేశాలు ఆర్థిక సాయం చేశాయని డాక్యుమెంట్‌ పేర్కొంది. ఇతర రాష్ట్రాలకు చెందిన పలువురు నిందితులను హోటల్‌లో పరామర్శించారు. సందర్శకులు ప్రయాణించేందుకు నకిలీ పేర్లతో టిక్కెట్లు బుక్ చేసుకున్నారని, బస కోసం హోటళ్లలో నమోదు చేసిన పేర్లు కూడా నకిలీవని పోలీసులు తెలిపారు.
ఎన్ఐఏ, ఈడీలు దేశవ్యాప్తంగా 15 రాష్ట్రాల్లో సోదాలు జరిపి 100 మందిని అరెస్ట్ చేసింది. ఎన్‌ఫోర్స్‌మెంట్ డైరెక్టరేట్ జరిపిన సోదాల్లో గత కొన్నేళ్లుగా పీఎఫ్ఐ, సంబంధిత సంస్థల ఖాతాల్లో రూ.120 కోట్లకు పైగా జమ అయినట్లు తేలింది. మతసామరస్యానికి భంగం కలిగించే ఉద్దేశ్యంతో పీఎఫ్ఐ సభ్యులు హత్రాస్‌కు వెళ్లారని దర్యాప్తులో వెల్లడైంది.
మతపరమైన అల్లర్లను రెచ్చగొట్టడం, భయాందోళనలు సృష్టించడం, ఉగ్రవాద ముఠా ఏర్పాటుకు ప్లాన్ చేయడం, మారణాయుధాలు, పేలుడు పదార్థాల సేకరణ, సున్నితమైన ప్రదేశాల్లో ఏకకాలంలో దాడులు చేయడంలో పీఎఫ్ఐ తన సభ్యుల ద్వారా పాలుపంచుకున్నట్లు ఆధారాలు కూడా కేంద్ర ఏజెన్సీలకు అందాయి. దీంతో పీఎఫ్ఐ కార్యకలాపాలపై కేంద్ర సంస్థలతో నిఘా వేయడంతో పాటు ఆ సంస్థను నిషేధించాలని కేంద్ర హోంమంత్రిత్వశాఖ యోచిస్తున్నట్లు తెలుస్తున్నది.
More Stories
ఈవీఎంలపై సుప్రీం తీర్పు విపక్షాలకు గట్టి చెంపదెబ్బ
ప్రాణహాని ఉందని జెడి లక్ష్మీనారాయణ ఫిర్యాదు
ఇవిఎంలపై పిటిషన్లు 40 సార్లు తిరస్కృతి