అధికారంలోకి వస్తే ఉచితంగా విద్య, వైద్యం

రానున్న ఎన్నికల్లో బీజేపీ ఖచ్చితంగా తెలంగాణాలో అధికారంలోకి వస్తుందని ధీమా వ్యక్తం చేస్తూ బీజేపీ అధికారంలోకి రాగానే ఉచిత విద్య, ఉచిత వైద్యం హామీకి కట్టుబడి వాటిని అమలు చేస్తామని బీజేపీ రాష్ట్ర అధ్యక్షుడు బండి సంజయ్ కుమార్ వెల్లడించారు.  ప్రజా సంగ్రామ యాత్ర రెండవ దశ విజయవంతం కావడంతో జూబ్లీహిల్స్ పెద్దమ్మతల్లిని ఆయన ఆదివారం దర్శించుకున్నారు.  అమ్మవారి ఆశీర్వాదంతోనే ప్రజా సంగ్రామయాత్ర విజయవంతం అయిందని చెప్పారు.

31 రోజుల్లో 383 కిమీ పాదయాత్ర పూర్తి చేసుకున్నారు. త్వరలో మూడోవిడత ప్రజా సంగ్రామయాత్ర చేపడతామని సంజయ్‌ చెప్పారు.  ముగింపు సభకు కేంద్ర హోమ్ మంత్రి అమిత్ షా రావడంతో ప్రతి కార్యకర్తల్లో జోష్ వచ్చిందని తెలిపారు.  ముగింపు సభకు లక్షలాదిగా ప్రజలు, బిజెపి కార్యకర్తలు స్వచ్ఛందంగా తరలి వచ్చారని చెబుతూ అమిత్ షా సందేశం బిజెపిని విమర్శలు చేసే కొన్ని రాజకీయ పార్టీలకు ఒక చెంపపెట్టు లాంటిదని సంజయ్ చెప్పారు.

పాదయాత్రలో ప్రజల కష్టాలు తెలుసుకున్నామని చెబుతూ ప్రజల నుండి వచ్చిన విజ్ఞప్తులను పరిశీలిస్తున్నామని తెలిపారు.  ఎంతోమంది ప్రజలు పేదరికంలో గుడిసెల్లో జీవిస్తున్నామని, లక్షల మందికి ఇండ్లు కూడా లేని పరిస్థితి నెలకొన్నదని పేర్కొంటూ బిజెపి అధికారంలోకి రావాలని పెద్దలందరూ కోరుకొంటున్నామని సంజయ్  చెప్పారు.