రేపే ఎన్నికలకు వెళ్లినా మేం సిద్ధం, గెలుస్తాం… అమిత్ షా

.కేసీఆర్‌‌‌‌ ముందస్తు ఎన్నికల కోసం ఫామ్​హౌస్‌‌‌‌లో కూర్చొని ప్రణాళికలు రచిస్తున్నారని, రేపే ఎన్నికలు వచ్చినా తెలంగాణలో బీజేపీ అధికారంలోకి రావడం ఖాయమని కేంద్ర హోం మంత్రి అమిత్‌ భరోసా వ్యక్తం చేశారు. బిజెపి రాష్ట్ర  అధ్యక్షుడు బండి సంజయ్ కుమార్ చేపట్టిన రెండో దశ  ప్రజా సంగ్రామ యాత్ర ముగింపు సందర్భంగా రంగారెడ్డి జిల్లా తుక్కుగూడ వద్ద శనివారం సాయంత్రం జరిగిన భారీ బహిరంగసభలో మాట్లాడుతూ రాష్ట్రంలో నయా నిజాం కేసీఆర్​ను గద్దె దించేందు కు ప్రతి ఒక్కరూ సిద్ధం కావాలని పిలుపునిచ్చారు.

తన జీవితం లో ఇంతటి పనికిమాలిన, ఇంతటి అవినీతి ప్రభుత్వాన్ని చూడలేదని చెబుతూ ఎన్నికలు ఎప్పుడు వచ్చినా ఎదుర్కొనేందుకు సిద్ధంగా ఉన్నామని స్పష్టం చేశారు.  టీఆర్ఎస్ కారు స్టీరింగ్ ఒవైసీ చేతిలో ఉందని ధ్వజమెత్తుతూ  టీఆర్ఎస్, మజ్లిస్‌ను ఒకేసారి విసిరేయాలని ప్రజలకు  షాపిలుపునిచ్చారు.

రాష్ట్రాన్ని బెంగాల్‌లా మారుద్దామని కేసీఆర్ భావిస్తున్నారని షా విమర్శించారు. బీజేపీ కార్యకర్తలపై దాడులు చేస్తే ఊరుకోబోమని హెచ్చరించారు. కేసీఆర్ మజ్లిస్‌తో చెట్టాపట్టాలు వేసుకుని తిరుగుతున్నారని, ఆ పార్టీ అంటే కేసీఆర్‌కు భయమని ఎద్దేవా చేశారు. కేసీఆర్‌ను గద్దె దించేందుకు తాను అవసరం లేదని, బండి సంజయ్ ఒక్కడు చాలని అన్నారు. బండి సంజయ్ చేపట్టిన ప్రజా సంగ్రామ యాత్ర పదవుల కోసం కాదని, ప్రజలందరి సంక్షేమం కోసం చేసిన యాత్ర అని అన్నారు.

రాష్ట్రంలోని నిరంకుశపాలనను అంతమొందించడం కోసం  జరిగిన యాత్ర అని స్పష్టం చేశారు. తెలంగాణ ఎవరి జాగీరు కాదని, రాష్ట్రంపై అందరికీ సమానహక్కు ఉందని తెలిపారు. అంబేద్కర్ రాజ్యాంగాన్ని మార్చాలని కేసీఆర్ భావిస్తున్నారని షా మండిపడ్డారు.