గత ఏడాది నవంబరులో కేంద్ర ప్రభుత్వం పెట్రోలు, డీజిల్‌లపై ఎక్సయిజ్ సుంకాన్ని తగ్గించిందని, ప్రజలపై భారం తగ్గాలనే లక్ష్యంతో ఈ చర్య తీసుకుందని ప్రధాని చెప్పారు. పన్నులను తగ్గించడం ద్వారా ఈ ప్రయోజనాన్ని ప్రజలకు బదిలీ చేయాలని రాష్ట్రాలను కోరిందని గుర్తు చేశారు. కొన్ని రాష్ట్రాలు తమ పన్నులను తగ్గించుకున్నాయని, కానీ కొన్ని రాష్ట్రాలు ఈ ప్రయోజనాన్ని ప్రజలకు అందజేయలేదని చెప్పారు.

దీనివల్ల ఈ రాష్ట్రాల్లో పెట్రోలు, డీజిల్‌ ధరలు అత్యధికంగా కొనసాగుతున్నాయని చెబుతూ ఓ విధంగా చెప్పాలంటే, ఇది ఆయా రాష్ట్రాల ప్రజలకు అన్యాయం జరగడం మాత్రమే కాకుండా, దీని ప్రభావం వాటి పొరుగు రాష్ట్రాలపై కూడా పడిందని ప్రధాని తెలిపారు. మహారాష్ట్ర, పశ్చిమ బెంగాల్, తెలంగాణా, ఆంధ్ర ప్రదేశ్, కేరళ, జార్ఖండ్, ఢిల్లీ, తమిళనాడు వంటి రాష్ట్రాలు ఏదో కారణం చేత కేంద్ర ప్రభుత్వం చెప్పిన మాటను వినలేదని ప్రధాని విచారం వ్యక్తం చేశారు.

 ఫలితంగా ఆ రాష్ట్రాల ప్రజలు ఇబ్బందులకు గురికావడం కొనసాగుతోందని తెలిపారు. ‘‘నవంబరులో మీరు చేసి ఉండవలసినదానిని, వ్యాట్‌ను తగ్గించడం ద్వారా ప్రజలకు ప్రయోజనాన్ని అందజేయాలని కోరుతున్నాను’’ అని మరోసారి ప్రధాని విజ్ఞప్తి చేశారు.