రష్యా ఆయిల్ కొనుగోలు పట్ల భారత కంపెనీల ఆసక్తి!

భారత ప్రభుత్వ రంగ ఆయిల్‌ కంపెనీలు రష్యా చమురు కొనుగోలుకు ఆసక్తి చూపుతున్నాయి. ఉక్రెయిన్‌పై రష్యా దాడి నేపథ్యంలో అమెరికా, ఐరోపా దేశాలు ఆంక్షలను విధించాయి. ఈ క్లిష్ల పరిస్థితుల నేపథ్యంలో రష్యా చమురును పలు పాశ్చత్య దేశాలు కొనడానికి నిరాకరిస్తున్నాయి. దీంతో చాలా దేశాలు రష్యా ముడి చమురు దిగుమతులకు స్వస్తి పలికాయి. 

ఈ క్రమంలో భారత్‌ లాంటి దేశాలకు రష్యా తన ముడి చమురుపై రాయితీ ప్రకటించింది. మార్కెట్‌ కంటే తక్కువ ధరకే చమురును సరఫరా చేస్తామని ఆఫర్‌ ఇచ్చింది. ఈ అవకాశాన్ని అందిపుచ్చుకోవాలని భారత పిఎస్‌యులు భావిస్తున్నాయని ఈ వ్యవహారంతో సంబంధం కలిగిన వర్గాలు తెలిపాయి. దీనిపై ఒక్కటి రెండు రోజుల్లో స్పష్టత రానుంది. 

ఈ లావాదేవీలు సరళంగా జరగడానికి భారత, రష్యా అధికారులు, బ్యాంకర్లు, కార్పొరేట్‌ ఎగ్జిక్యూటివ్‌లు తీవ్ర కసరత్తులో ఉన్నారు. ఇదే విషయంలో చమురు కంపెనీలు, బ్యాంకర్లు సులభ చెల్లింపుల కోసం ఆర్‌బిఐ అధికారులతో సమీక్షలు జరుపుతున్నారు. ప్రస్తుతం రష్యా నుంచి సరఫరాకు ఓడల కొరత కూడా నెలకొంది. దీని పరిష్కారంపై కూడా అధికారులు దృష్టి పెడుతున్నారు.

భారత చమురు కంపెనీలు తమ ఆసక్తులు, భద్రతపై దృష్టి సారిస్తున్నాయని ఓ పిఎస్‌యు ఎగ్జిక్యూటివ్‌ పేర్కొన్నారు. రష్యా నుంచి అనేక ఐరోపా దేశాలు చమురు కొనుగోలు చేస్తున్నప్పుడు భారత్‌ ఎందుకు చేయకూడదని ప్రశ్నించారు. చమురు సంప్రదాయ ప్రాంతాలైన మధ్య ఈశాన్య దేశాలు ధరలు పెంచినప్పుడు రష్యాలో చౌకగా లభించే చమురు అవకాశాలను భారత కంపెనీలు ఉపయోగించుకోవడం మంచి అవకాశమేనని స్పష్టం చేశారు.

అమెరికా ప్రభుత్వ వర్గాలు సహితం భారత్ రష్యా నుండి చమురు కొనుగోలు చేయడం తాము విధించిన ఆర్ధిక ఆంక్షల పరిధిలోకి రాదని స్పష్టం చేయడం గమనార్హం. అయితే యుద్ధం జరుగుతున్న సమయంలో ఆ విధంగా చేయడం ద్వారా చరిత్రలో ఒక దురాక్రమణదారుడి వైపు భారత్ ఉన్నట్లు అపఖ్యాతి పాలవుతుందని అంటూ భారత్ పై రష్యాకు వ్యతిరేకంగా వత్తిడి తెచ్చే  ప్రయత్నం మాత్రం చేస్తున్నట్లు కనబడింది.

కాగా, రష్యాపై ఆంక్షల నేపథ్యంలో తమ ప్లాంట్ల కోసం రష్యా ముడిచమురు కొనుగోలును తిరస్కరించే అవకాశం ఉందని రిలయన్స్  కంపెనీ సీనియర్‌ వైస్‌ ప్రెసిడెంట్‌ అండ్‌ బిజినెస్‌ హెడ్‌ క్రాకర్‌ రాజేష్‌ రావత్‌ పేర్కొన్నారు. ప్రస్తుతం రిలయన్స్‌ తన రిఫైనరీ కాంప్లెక్స్‌ కోసం రష్యా యురల్స్‌ ముడిచమురును నేరుగా కొనుగోలు చేస్తోంది. రిఫైనరీలో అధిక భాగం మధ్య తూర్పు, అమెరికా నుంచి తీసుకుంటుంది.