సిఎఎ, ఎన్‌ఆర్‌సిలు హిందూ-ముస్లిం అంశమే కాదు

నరేంద్ర మోదీ ప్రభుత్వం తీసుకువచ్చిన పౌరత్వ సవరణ చట్టం (సిఎఎ),  నేషనల్ రిజిస్టర్ ఆఫ్ సిటిజన్స్ (ఎన్‌ఆర్‌సి)లకు దేశంలో నెలకొన్న హిందూ-ముస్లిం వివాదంతో ఎటువంటి సంబంధం లేదని రాష్ట్రీయ స్వయంసేవక్ సంఘ్ సర్ సంఘ్ చాలక్  డా. మోహన్ భాగవత్ స్పష్టం చేశారు. ఈ చట్టాలను వ్యతిరేకిస్తున్నవారు వీటిని కేవలం ముస్లిం జనాభాను తగ్గించడం కోసం ఉద్దేశించినట్లు వారిలో దురభిప్రాయం కల్పించే ప్రయత్నం చేస్తున్నారని ఆగ్రహం వ్యక్తం చేశారు. 

రెండు రోజుల అస్సాం పర్యటనకు వచ్చిన ఆయన బుధవారం గౌహతిలో డా. నాని గోపాల్ మహంత వ్రాసిన “సిఎఎ, ఎన్‌ఆర్‌సి చర్చ” గ్రంధాన్ని ముఖ్యమంత్రి మహంత్ బిస్వాస్ శర్మతో కలసి ఆవిష్కరించారు. కొందరు రాజకీయ ప్రయోజనం పొందడం కోసం ఈ రెండు అంశాలపై మతపరమైన కధనాలు వ్యాప్తి చేస్తున్నారని ఈ సందర్భంగా డా. భాగవత్ ఆరోపించారు.

పౌరసత్వ చట్టం వల్ల ఏ ఒక్క ముస్లింకూ నష్టం జరగదని ఆయన స్పష్టం చేస్తూ ఈ చట్టాలకు వ్యతిరేకంగా నిరసనల పేరిట కొందరు  అవకాశవాదులు హింస, విధ్వంసములకు కారణం అవుతున్నారని విచారం వ్యక్తం చేశారు. అల్లర్లు, ఘర్షణలు రెచ్చగొట్టడం కోసం కొందరు ప్రయత్నం చేస్తూనే ఉన్నారని హెచ్చరించారు.

పౌరసత్వ చట్టం పొరుగు దేశాలలో హింసకు గురైన మైనారిటీలకు రక్షణ కల్పిస్తుందని ఆయన తెలిపారు. “విపత్తు సమయంలో ఈ దేశాలలో కూడా మనం మెజారిటీ వర్గాలకు చేరుకుంటాము. కాబట్టి బెదిరింపులు,  భయం కారణంగా మన దేశానికి రావాలని కోరుకునే వారు కొందరు ఉంటే, మనం వారికి ఖచ్చితంగా సహాయం చేయాల్సి ఉంటుంది” అని భగవత్ స్పష్టం చేశారు.

ఎన్‌ఆర్‌సి గురించి మాట్లాడుతూ, తన పౌరులు ఎవరో తెలుసుకునే హక్కు అన్ని దేశాలకు ఉందని ఆయన తెలిపారు. “ప్రభుత్వం ఇందులో పాలుపంచుకున్నందున ఈ విషయం రాజకీయ రంగంలో ఉంది … ఈ రెండు సమస్యల చుట్టూ ఒక వర్గ కథనాన్ని సృజనాత్మకంగా సృష్టించడం ద్వారా రాజకీయ మైలేజీని పొందాలని ఒక వర్గం కోరుకుంటుంది” అని ఆయన చెప్పారు.